انٹرنیشنل اسکواش کا آغاز(کل) ہوگا ،ْپلیئرز کو فول پروف سیکیورٹی فراہم کی جائے گی

چمپئن شپ کا افتتاح اپنے دورکے عظیم کھلاڑی اور سابق عالمی چمپئن جہانگیرخان کریں گے ،ْغیر ملکی کھلاڑی شرکت کرینگے

اتوار 18 نومبر 2018 12:50

کراچی(اُردو پوائنٹ اخبارتازہ ترین - این این آئی۔ 18 نومبر2018ء) ڈی ایچ اے کپ انٹرنیشنل اسکواش چمپئن شپ کا آغاز (کل)منگل سے ہوگا تاہم 24 نومبر تک ڈی اے اتھارٹی کلب میں شیڈول 5 روزہ چمپئن شپ میں شریک غیرملکی کھلاڑیوں کوفول پروف سیکیورٹی فراہم کی جائے گی۔ٹورنامنٹ ڈائریکٹر اورسندھ اسکواش ایسوسی ایشن کے سیکریٹری راشد احمد نے بتایا کہ پی ایس اے سے رجسٹرڈ اور پاکستان اسکواش فیڈریشن سے منظور شدہ چمپئن شپ میں مینز اور ویمنزایونٹس کے مقابلے شیڈول ہیں، ساڑھے 23ڈالرز کی انعامی رقم کی چمپئن شپ میں مینز ایونٹ کے لیی18ہزاراور ویمنز ایونٹ کے لیے ساڑھے 5 ڈالرز کی انعامی رقم رکھی گئی ہے۔

انہوں نے بتایا کہ ان مقابلوں میں17ممالک سے تعلق رکھنے والے عالمی رینکنگ کے مرد اور خواتین کھلاڑی شرکت کررہے ہیں،32،32 کھلاڑیوں کے دونوں ایونٹس میں ٹاپ8،8 کھلاڑیوں کو بائی دی گئی ہے جبکہ پہلے راؤنڈ میں 16،16 کھلاڑی کورٹ میں اتریں گے۔

(جاری ہے)

مینز ایونٹ میں عالمی رینکنگ میں 45 ویں پوزیشن کے حامل مصرکے کریم الفاتحی کوٹاپ سیڈ قراردیا گیا ہے جبکہ مصر ہی کے عالمی نمبر 52 سیڈ 2 کھلاڑی قرار پائے ہیں، ملائیشیا کے ایوان یون سیڈ3 اورپاکستان کے طیب اسلم سیڈ 4 کھلاڑی ہوں گے، پاکستان کے 3 کھلاڑیوں قومی انڈر19 چمپئن نوید رحمان، سعد عبداللہ اورنعمان خان کووائلڈ کارڈ انٹری دی گئی ہے، پاکستان کے دیگر8 کھلاڑی فرحان محبوب، فرحان زمان، شاہ جہاں خان، اسرار احمد، سید علی مجتبیٰ شاہ بخاری، خواجہ عادل مقبول، دانش اطلس خان اور عماد فرید بھی مین ڈرا میں شامل ہیں۔

خواتین کی عالمی رینکنگ میں 89 ویں پوزیشن پربراجمان پاکستان کی مدینہ ظفرویمنز ایونٹ کی ٹاپ سیڈ ہیں جبکہ عالمی نمبر99 ملائیشیا کی اوئی کہایان سیڈ2 ہوں گی،مصری کھلاڑی فریدہ اور فرح مومن بالترتیب سید3 اور سیڈ4 ہیں۔چمپئن شپ کا افتتاح اپنے دورکے عظیم کھلاڑی اور سابق عالمی چمپئن جہانگیرخان کریں گے جبکہ فائنلز اوراختتامی تقریب کے موقع پرکورکمانڈرلیفٹیننٹ جنرل ہمایوں عزیز کراچی مہمان خصوصی کی حیثیت سے انعامات تقسیم کریں گے، انھوں نے کہا کہ 10برس کے بعد غیرملکی پلیئرزکی انٹرنیشنل ایونٹ میں شرکت سے عالمی سطح پر پاکستان کے حوالے سے مثبت تاثرجائے گا، طاہرخانزادہ ٹورنامنٹ ریفری ہوں گے۔

متعلقہ عنوان :