شادی کے بعد دپیکا پڈوکون اوررنویر سنگھ کی گھرواپسی

ممبئی ایئر پورٹ پر روایتی ملبوسات میں ملبوس دونوں اسٹارز نے اپنے چاہنے والوں کے دل جیت لیے دپیکا کی سسرال آمد پر ہندو روایات کیمطابق گھر میں داخل ہونے کی رسم اداکی گئی اورپرپتاک استقبال کیا گیا

پیر 19 نومبر 2018 12:10

ممبئی(اُردو پوائنٹ اخبارتازہ ترین - این این آئی۔ 19 نومبر2018ء) اٹلی میں شادی کی خوبصورت تقریب کے بعد دپیکا پڈوکون اوررنویر سنگھ کی گھرواپسی ہوگئی ہے۔چند روز قبل اٹلی کے خوبصورت مقام لیک کومو میں شاہی انداز میں شادی کے بندھن میں بندھنے والی بالی ووڈ کی سپر ہٹ جوڑی دپیکا پڈوکون اوررنویر سنگھ گھر واپس آگئے ہیں۔ممبئی ایئر پورٹ پر روایتی ملبوسات میں ملبوس دونوں اسٹارز نے اپنے چاہنے والوں کے دل جیت لیے۔

رنویر سنگھ نے ممبئی واپسی کے لیے کریم کلر کے کرتے اور گلابی واسکٹ کاانتخاب کیا جب کہ دپیکا پڈوکون بھی رنویر کے ہم رنگ لباس اور سرخ بنارسی ڈوپٹے میں نظر آئیں۔ایئر پورٹ پر اور رنویر سنگھ کے گھر کے باہر دونوں نے میڈیا اوراپنے چاہنے والوں کو بھرپورانداز میں ہاتھ ہلاکر اپنی آمد کی اطلاع دی اس موقع پر دونوں کے چہروں پر بکھری ہنسی اس بات کا ثبوت ہے کہ دونوں ایک دوسرے کا ساتھ پاکر بے انتہا خوش ہیں۔

(جاری ہے)

دپیکا پڈوکون نے مبارکباد دینے والے صحافیوں سے خوشگوار انداز میں چاکلیٹس کا مطالبہ بھی کیا۔دپیکا کی سسرال آمد پر ہندو روایات کے مطابق ان کی گھر میں داخل ہونے کی رسم اداکی گئی جس کے بعد ان کا گھر میں استقبال کیا گیا۔میڈیا رپورٹس کے مطابق دپیکا رنویر کے استقبالیے کی تین تقاریب منعقد کی جائیں گی ایک بنگلورو میں 21 نومبر کو، دوسری ممبئی کے گرینڈ ہایٹ ہوٹل میں 28 نومبر کو اور تیسری تقریب یکم دسمبر کو ہوگی، استقبالیے میں بالی ووڈ کی نامور شخصیات کی شرکت متوقع ہے۔

متعلقہ عنوان :