حکومت پنجاب نے آئی ایل او کے تعاون سے شرح خواندگی میں اضافہ کیلئے صنعتی ورکرز کی تعلیم کے پروگرام کاآغاز کر دیا

پیر 19 نومبر 2018 15:11

فیصل آباد (اُردو پوائنٹ اخبارتازہ ترین - اے پی پی۔ 19 نومبر2018ء) حکومت پنجاب نے آئی ایل او کے تعاون سے شرح خواندگی میں اضافہ کیلئے صنعتی ورکرز کی تعلیم کے پروگرام کا آغاز کر دیا ہے جس سے صنعتی مزدوروں میں شرح خواندگی کو بہتر بنانے میں خاطر خواہ مدد ملے گی۔ لٹریسی اینڈ نان فارمل بیسک ایجوکیشن ڈیپارٹمنٹ کے ذرائع نے بتایاکہ پاکستان میں اس وقت شرح خواندگی 60 فیصد ہے جو خطے کے دیگر ممالک ما سوائے بنگلہ دیش کے سب سے کم ہے۔

انہوںنے بتایاکہ اٹھارویں ترمیم کے بعد تعلیم کی ذمہ داری بھی صوبوں کے پاس آگئی ہوئی ہے چنانچہ اس ضمن میں حکومت پنجاب صوبے میں شرح خواندگی میں اضافے کیلئے متعدد اقدامات کر رہی ہے۔ انہوں نے مزید کہا کہ پنجاب میں کل آبادی میں سے 35 ملین ناخواندہ ہے جس میں 28 ملین بالغ افراد بھی شامل ہیں۔

(جاری ہے)

انہوں نے کہا کہ حکومت پنجاب مختلف بین الاقوامی اداروں کی معاونت سے صوبے میں شرح خواندگی کے 88 فیصد ٹارگٹ کو حاصل کرنے کیلئے اقدامات کر رہی ہے جو 2018 ء میں حاصل کیا جانا تھا۔

انہوں نے کہا کہ حکومت پنجاب آئی ایل او کے تعاون سے فیصل آباد کے مختلف صنعتی علاقوں میںمزید لٹریسی سنٹرز کھولے گی تا کہ صنعتی مزدوروں کو بنیادی تعلیم کی فراہمی کے بعد قومی دھارے میں شامل کیا جا سکے اور ملکی خواندگی میں اضافہ ہو۔