محکمہ زراعت نے گندم کی بمپر کراپ کے حصول کیلئے جدید پیداواری حکمت عملی پر عملدرآمد تیز کر دیا ،ترجمان زراعت

فیصل آباد۔20 نومبر(اُردو پوائنٹ اخبارتازہ ترین - اے پی پی۔ 20 نومبر2018ء) محکمہ زراعت نے گندم کی بمپر کراپ کے حصول کیلئے جدید پیداواری حکمت عملی پر عملدرآمد تیز کر دیا ہے جبکہ اس ضمن میں کھادوں سمیت دیگر زرعی لوازمات کی بروقت دستیابی پر بھر پور توجہ مرکوزکر دی گئی ہے اور پنجاب بھر کے تمام اضلاع کے ڈپٹی کمشنرز ، ایڈیشنل ڈپٹی کمشنرز ریونیو ، اسسٹنٹ کمشنرز ، ڈسٹرکٹ آفیسرز ایگری کلچر و زراعت افسران کو ہدایت کی گئی ہے کہ وہ گندم کی بمپر کراپ کے حصول کیلئے تمام متعلقہ زرعی لوازمات کی کاشتکاروں کو بروقت فراہمی یقینی بنائیں جبکہ پرنٹ و الیکٹرانک میڈیاکے ذریعے کاشتکاروں کو تمام ممکن رہنمائی فراہم کی جائے تاکہ رواں سال کیلئے 16.7 ملین ایکڑ سے زائد رقبہ پر گندم کی کاشت کاہدف مکمل کرکے پنجاب سے 19.4ملین ٹن سے زائد کا پیداواری ہدف حاصل کیاجاسکے۔

(جاری ہے)

محکمہ زراعت کے ترجمان نے بتایاکہ پاکستان کے بہترین قدرتی ماحول ، شاندار آب و ہوا اور ذرخیز زمینوں کی بدولت گندم کی پیداوار میں اضافہ کا رجحان دیکھنے میں آیا ہے جبکہ ہمارے پاس گند م کی ایسی اقسام موجود ہیں جو زیادہ پیداواری صلاحیت کے علاوہ ناموافق موسمی حالات کا مقابلہ کرنے کی بھی بھرپور صلاحیت رکھتی ہیں۔ انہوںنے کہاکہ بہتر منصوبہ بندی اور جدید پیداواری ٹیکنالوجی پر عملدرآمد کرکے گندم کی فی ایکڑ شاندار پیداوار حاصل کی جاسکتی ہے۔ انہوںنے مزید بتایاکہ اس سال مون سون کے آخر میں پنجاب سمیت ملک بھر میں اچھی بارشیں ہوئیں جن کے گندم کی رواں فصل پر خوشگوار اثرات مرتب ہوں گے۔