پی آئی اے سیالکوٹ سے شارجہ کے لئے دو ہفتہ وار پروازیں شروع کر رہی ہے ، سی ای اوارشد ملک

کراچی۔ (اُردو پوائنٹ اخبارتازہ ترین - اے پی پی۔ 20 نومبر2018ء) پاکستان انٹرنیشنل ائیرلائن (پی آئی ای) اپنے بند کئے گئے منافع بخش روٹس پر پروازیں دوبارہ سے شروع کر رہی ہے، اس سلسلے میں لاہور سے مسقط کے بعد اب سیالکوٹ سے شارجہ کے لئے بھی پروازیں دوبارہ شروع کی جا رہی ہیں۔ منگل کو جاری کردہ اعلامیہ کے مطابق پی آئی اے کے صدر و چیف ایگزیکٹو آفیسر ائرمارشل ارشد ملک نے اس موقع پر اپنے پیغام میں کہا ہے کہ سیالکوٹ پاکستانی معیشت میں ریڑھ کی ہڈی کی حیثیت رکھتا ہے اور اس کا دنیا سے تیز رفتار رابطہ نا گزیر ہے ۔

پی آئی اے نے پاکستان کے پہلے نجی شعبے کے تحت چلنے والے ائر پورٹ سے سب سے پہلے اپنی پروازیں شروع کیں۔ پی آئی اے مستقبل میں سیالکوٹ سے یورپی ممالک کے لئے بھی پروازوں کی منصوبہ بندی کر رہی۔

(جاری ہے)

ائر مارشل ارشد ملک نے کہا کہ ان کی یہ کوشش ہے کہ پی آئی اے کے ریونیو میں اضافہ کیا جائے اور مسافروں کو ان کے قریب ترین ائر پورٹس سے بہترین سفری سہولیات کی فراہمی کو یقینی بنایا جائے اور اس سلسلے میں پی آئی اے کی مارکیٹنگ ٹیم حکمت عملی طے کر رہی ہے۔

چیف ایگزیکٹو آفیسر سیالکوٹ انٹر نیشنل ائر پورٹ میجر جنرل (ر) محمد عابد نذیر تقریب کے مہمان خصوصی تھے۔ تقریب میں پی آئی اے کے ڈسٹرکٹ منیجر محمد عارف، اسٹیشن منیجر طارق گلزار اور پی آئی اے اور دیگر محکموں کے اعلی افسران بھی شریک تھے۔ سیالکوٹ سے شارجہ کے لئے دو ہفتہ وار پروازیں شروع کر دی گئی ہیں یہ پروازیں منگل اور جمعہ کو چلائی جائیں گی۔ ان پروازوں کے بعد شارجہ کے لئے پروازوں کی ہفتہ وار تعداد پانچ ہو جائے گی جن میں سے تین پہلے ہی تربت سے شارجہ کے لئے روانہ ہوتی ہیں۔