پاکستان ریلوے کل سے 4 ٹرینیں چلائے گی

جمعرات 22 نومبر 2018 15:07

اسلام آباد ۔ (اُردو پوائنٹ اخبارتازہ ترین - اے پی پی۔ 22 نومبر2018ء) پاکستان ریلوے کل جمعہ سے 4 ٹرینیں چلائے گی جن میں سندھ ایکسپریس (کراچی سے سکھر)، شاہ عبدالطیف بھٹائی ایکسپریس (کراچی سے میرپور خاص)، فیصل آباد ایکسپریس اور رحمان بابا ایکسپریس (پشاور سے کراچی) شامل ہیں۔ سندھ ایکسپریس براستہ کراچی کینٹ، لانڈھی، حیدرآباد، ٹنڈوآدم، شہداد پور، نواب شاہ، خیرپور سے ہوتے ہوئے سکھر پہنچے گی۔

پاکستان ریلوے کی طرف سے جاری پریس ریلیز کے مطابق وزیراعظم عمران خان (آج) جمعہ کو ان ٹرینوں کا افتتاح کریں گے۔

(جاری ہے)

سندھ ایکسپریس کی اکانومی کلاس کا کرایہ 470 روپے ہوگا جبکہ شاہ عبداللطیف بھٹائی ایکسپریس، کراچی سٹی، لانڈھی، دھابے جی، حیدرآباد سے ہوتے ہوئے میرپورخاص پہنچے گی۔ اس کا کرایہ 190 روپے ہوگا۔ اس کے علاوہ فیصل آباد ایکسپریس لاہور سے براستہ فیصل آباد، ملتان تک جائے گی۔ اس کے روٹ میں خانیوال اور شور کوٹ بھی شامل ہے، اس کی اکانومی کلاس کا کرایہ 260 روپے ہو گا۔ واضح رہے کہ شیخ رشید احمد وفاقی وزیر ریلوے کی محنت کی وجہ سے یہ سب کچھ ہوا ہے۔ ان ٹرینوں کے آغاز سے وفاقی وزیر ریلوے نئی حکومت کے پہلے 100 دنوں میں دس ٹرینیں چلانے کا ٹارگٹ پورا کر لیں گے۔