دورہ ملائیشیا پر مہاتیر محمد کا وزیراعظم عمران خان سے اظہارِ تشکر

مہاتیر محمد نے عمران خان اور ان کے وفد کے دورہ ملائیشیا کی تصاویر بھی ٹوئیٹر پر شیئر کردیں

جمعرات 22 نومبر 2018 16:07

کوالالمپور (اُردو پوائنٹ اخبارتازہ ترین - این این آئی۔ 22 نومبر2018ء) ملائیشین وزیراعظم مہاتیر محمد نے وزیراعظم عمران خان کے دورہ پران کا شکریہ اداکرتے ہوئے اسے دونوں ممالک کے لیے خوش آئند قرار دیاہے اورکہاہے کہ مجھے یقین ہے کہ آپ کا دورہ دونوں ممالک، خطے اور عوام کے درمیان بہترین تعاون کے فروغ اور تبادلے کا باعث بنے گا۔ میڈیارپورٹس کے مطابق ٹوئٹر پر ٹوئٹ کر کے اپنے پیغام میں ملائیشیا کے وزیراعظم کا کہنا تھا کہ میں ملائیشیا کا دورہ کرنے پر آپ کا شکریہ ادا کرتا ہوں اور امید کرتا ہوں کہ آپ کا اور آپ کے وفد کا وقت ثمر آور رہا ہوگا۔

مہاتیر محمد کامزید کہنا تھا کہ مجھے یقین ہے کہ آپ کا دورہ دونوں ممالک، خطے اور عوام کے درمیان بہترین تعاون کے فروغ اور تبادلے کا باعث بنے گا۔

(جاری ہے)

اپنے پیغام کے ساتھ ڈاکٹر مہاتیر محمد کی جانب سے وزیراعظم پاکستان عمران خان اور ان کے وفد کے دورہ ملائیشیا کی تصاویر بھی شیئر کی گئیں۔واضح رہے کہ وزیر اعظم عمران خان 20 نومبر کی رات کو ملائیشیا کے 2 روزہ دورے پر اپنے وفد کے ہمراہ کوالالمپور پہنچے تھے۔

وزیراعظم کے ہمراہ ملائیشیا جانے والے وفد میں و زیر خارجہ شاہ محمود قریشی، وزیر خزانہ اسد عمر اور مشیر برائے تجارت عبدالرزاق داؤد بھی موجود تھے۔جہاں انہوں نے ملائیشیا کے وزیر اعظم مہاتیر محمد کے ساتھ مشترکہ پریس کانفرنس کی اور انہیں 23 مارچ 2019 کو یومِ پاکستان کی تقریبات میں شرکت کے لیے پاکستان آنے کی دعوت دی۔