مسقط اور شارجہ کے بعد ایک ماہ میں پی آئی اے کی تیسری کاوش،اسلام آباد سے دوحہ کیلئے دوسری پرواز کا آغاز

ہمارا ترقی اور بحالی کے سفر کا آغاز ہو چکا ،ْ عنقریب ہم مزید مقامات کے لئے پروازیں شروع کر رہے ہیں ،ْ چیف ایگزیکٹو آفیسر ائیر مارشل ارشد ملک

اتوار 2 دسمبر 2018 14:20

اسلام آباد (اُردو پوائنٹ اخبارتازہ ترین - این این آئی۔ 02 دسمبر2018ء) شارجہ اور مسقط کے بعد پی آئی اے نے اسلام آباد سے دوحہ(قطر) کیلئے دوسری پرواز شروع کردی ،ْجو ہر اتوار کو ایک بجے رات روانہ ہو گی اس سلسلے کی پہلی پرواز 2 دسمبر کوہفتے اور اتوار کی درمیانی شب ایک بجے روانہ ہوئی۔

(جاری ہے)

ترجمان پی آئی اے کے مطابق پی آئی اے کے صدر و چیف ایگزیکٹو آفیسر ایئر مارشل ارشد ملک نے اپنے پیغام میں کہا کہ ہمارا ترقی اور بحالی کے سفر کا آغاز ہو چکا ہے اور عنقریب ہم مزید مقامات کیلئے پروازیں شروع کر رہے ہیں ان میں لاہور سے بنکاک کوالالمپور اور سیالکوٹ سے بارسلونا سر فہرست ہیں ۔

انہوں نے اس موقع پر پی آئی اے کے کارکنوں کی کاوشوں کو سراہتے ہوئے مبارکباد پیش کی اور مسافروں کے لئے سہولیات اور انکا مکمل خیال رکھنے کی ہدایت کی۔مسافروں کو الوداع کرنے کے لئے پی آئی اے اسلام آباد کے اعلی افسران موجود تھے جن میں جنرل منیجر کسٹمر سروسز انعام باری، ڈسٹرکٹ منیجر جنید خان، منیجر پبلک ریلشنز امجد درانی، منیجر کوآرڈینیشن عثمان عین الدین، اسٹیشن منیجر پرویز نصیر اور منیجر پیسنجر سروسز چوہدری بشیر شامل تھے۔ کاروباری حلقوں اور مسافروں کی جانب سے پی آئی اے کی نئی کاوش کا بھرپور خیر مقدم کیا گیا ۔