منرل واٹر کیس ،ْکمپنیاں قیمتیں بڑھائیں گی نہ بوجھ صارف پر منتقل ہوگا ،ْ چیف جسٹس ثاقب نثار

اسلام آباد(اُردو پوائنٹ اخبارتازہ ترین - این این آئی۔ 06 دسمبر2018ء) چیف جسٹس آف پاکستان جسٹس میاں ثاقب نثار نے کہا ہے کہ منرل واٹر کمپنیاں پانی کی بوتلوں کی قیمتیں نہیں بڑھائیں گی اور قیمت کا بوجھ صارف پر منتقل نہیں ہوگا۔ جمعرات کو چیف جسٹس کی سربراہی میں سپریم کورٹ کے تین رکنی بینچ نے کانفرنس روم میں منرل واٹر کی قیمتوں سے متعلق کیس کی سماعت کی۔

وکیل اعتزاز احسن نے کہا کہ عدالت نے بہت بڑا کام کر دیا ہے جس پر چیف جسٹس نے کہا کہ پانی کی ٹریٹمنٹ پر جو کام فوری ہو سکتا ہے وہ کریں جبکہ جس کام میں تاخیر ہو سکتی ہے اس کے لیے ٹائم فریم طے کر لیں۔انہوں نے کہا کہ کمپنیاں زیر زمین سے بڑی مقدار میں پانی نکال رہی ہیں، پانی کی قیمت عدالت نے مقرر کر دی ہے، پانی کی بوتلوں کی قیمتیں کمپنیاں نہیں بڑھائیں گی اور پانی کی قیمت کا بوجھ صارف پر منتقل نہیں ہوگا۔

(جاری ہے)

انہوںنے کہاکہ سندھ حکومت نے زیر زمین پانی کے استعمال کی قیمت مقرر کر دی ہے۔نمائندہ بلوچستان نے عدالت کو بتایا کہ بلوچستان نے بھی منرل واٹر اور سافٹ ڈرنکس سمیت ہر قسم کے پانی کے استعمال کی قیمت مقرر کر دی ہے۔چیف جسٹس نے کہا کہ وسائل کی چوری نہیں ہونی چاہیے اور سارے کام نیک نیتی سے ہونے چاہئیں۔انہوں نے کہا کہ میں تو منرل واٹر کے استعمال کے خلاف مہم شروع کرنے کی سوچ رہا تھا۔انہوںنے کہاکہ کمپنیاں پانی کی ٹریٹمنٹ اور بہتری کے لیے عدالتی کمیشن کے ساتھ بیٹھ کر تجاویز طے کر لیں اور فریقین اپنی طے کردہ تجاویز سے 13 دسمبر کو عدالت کو آگاہ کر دیں۔کیس کی سماعت 13 دسمبر تک ملتوی کردی گئی۔