خواجہ برادران کی احتساب عدالت میں پیشی

لاہور (اُردو پوائنٹ تازہ ترین اخبار۔ 12 دسمبر 2018ء) : پیراگون ہاؤسنگ اسکینڈل میں خواجہ برادران کو گذشتہ روز گرفتار کیا گیا جس کے بعد آج انہیں احتساب عدالت میں پیش کیاگیا ۔ احتساب عدالت آمد کے موقع پر خواجہ سعد رفیق نے ''شیر، شیر '' کے نعرے لگائے اور ہاتھ اُٹھا اُٹھا کر نعرے بازی کی جس پر لیگی کارکنان نے بھی ان کا بھرپور ساتھ دیا۔ احتساب عدالت آمد پر ''شیر، شیر'' کے نعرے لگانے کی خواجہ سعد رفیق کی ویڈیو آپ بھی ملاحظہ کیجئیے:

 خیال رہے کہ پیراگون سوسائٹی اسکینڈل میں زیر حراست خواجہ برادران کو آج احتساب عدالت کے جج نجم الحسن کی عدالت میں پیش کیا گیا۔

(جاری ہے)

نیب نے خواجہ برادران کے 15 روزہ جسمانی ریمانڈ کی استدعا کی جسے احتساب عدالت نے جزوی طور پر منظور کرتے ہوئے خواجہ برادران کو 10 روزہ جسمانی ریمانڈ پر نیب کے حوالے کر دیا ۔ احتساب عدالت نے حکم دیا کہ 22 دسمبر کو خواجہ برادران کو دوبارہ عدالت کے روبرو پیش کیا جائے۔ خواجہ سعد رفیق اور ان کے بھائی خواجہ سلمان رفیق کی احتساب عدالت میں پیشی کے موقع پر سکیورٹی انتہائی سخت رکھی گئی۔

لیگی کارکنان کے احتجاج کے پیش نظر عدالت کو خاردار تاروں سے سیل کردیا گیا جبکہ پولیس کی بھاری نفری طلب کی گئی ہے۔کمرہ عدالت میں اپنے وکیل کے ہمراہ گفتگو کرتے ہوئے سابق وفاقی وزیر ریلوے خواجہ سعد رفیق نے کہا کہ عدالت میں لوگوں کو آنے کی اجازت نہیں ہے۔ میرے گھر کا کھانا بند کر دیا گیا ہے۔ انہوں نے کہا کہ نیب میں واش روم کے اندر چٹخنی نہیں ہے۔

نیب انسانی حقوق کی خلاف ورزی کر رہا ہے۔ خواجہ سعد رفیق نے شکایات کے انبار لگاتے ہوئے کہا کہ میں نے آج صبح ناشتہ بھی نہیں کیا کیونکہ ہمیں دیا جانے والا ناشتہ کھانے کے قابل نہیں تھا۔ یاد رہے کہ خواجہ برادران اس سے قبل عبوری ضمانت پر تھے جس میں کئی مرتبہ توسیع کی گئی۔ گذشتہ روز احتساب عدالت نے پیراگون سوسائٹی اسکینڈل میں خواجہ سعد رفیق اور ان کے بھائی خواجہ سلمان رفیق کی عبوری ضمانت کی درخواست خارج کردی تھی جس کے بعد نیب نے خواجہ برادران کو حراست میں لے لیا تھا۔

پیراگون ہاؤسنگ اسکینڈل میں اس سے قبل خواجہ سعد رفیق کے دست راست قیصر امین بٹ کو گرفتار کیا گیا تھا اور ذرائع کے مطابق قیصر امین بٹ کے انکشافات کی وجہ سے ہی خواجہ برادران کی گرفتاری عمل میں لائی گئی۔ یہاں یہ بات قابل ذکر رہے کہ خواجہ برادران پیراگون ہاؤسنگ اسکینڈل سمیت 3 مقدمات میں نیب کو مطلوب تھے۔