موٹروے پولیس کی ایم تھری فیصل آباد پنڈی بھٹیاں پر دھند کے دوران انڈیکیٹرز اور فوگ لائٹس کا استعمال یقینی بنانے کی ہدایت

فیصل آباد (اُردو پوائنٹ اخبارتازہ ترین - اے پی پی۔ 12 دسمبر2018ء) موٹروے پولیس نے ایم تھری فیصل آباد پنڈی بھٹیاں پر دھند کے دوران انڈیکیٹرز اور فوگ لائٹس کا استعمال یقینی بنانے کی ہدایت کی ہے اورموسم سرما کی شدت بڑھنے ،سردی کے باعث دھند میںاضافہ کی وجہ سے حادثات سے بچائو کی غرض سے فوگ لائٹس کے بغیر گاڑیوں کو موٹر وے پر داخل ہونے سے روک دیاہے اور کہاہے کہ فوگ لائٹس کے بغیر گاڑیاں موٹر وے پر داخل نہ ہوں ورنہ ان کے خلاف کارروائی عمل میں لائی جائے گی اور ان کے چالان بھی کردیئے جائیں گے۔

موٹر وے ایم تھری پولیس کے ترجمان نے بتایا کہ چونکہ علی الصبح کے اوقات میں مذکورہ موٹر وے پر کچھ وقت کیلئے دھند کا سلسلہ شروع ہوگیاہے اور حد نظر بھی کم ہو رہی ہے لہٰذا فیصل آباد کے کسی بھی انٹر چینج سے فوگ لائٹ کے بغیر کوئی گاڑی موٹر وے پر نہ جائے تاکہ ان کے ڈرائیورز کو کسی پریشانی کاسامنا نہ کرناپڑے۔

(جاری ہے)

انہوںنے بتا یا کہ موٹر وے پر سست رفتاری کا مظاہرہ کرنے والے ڈرائیوروں کے خلاف بھی کارروائی کا فیصلہ کیا گیا ہے۔

انہوںنے بتا یا کہ موٹر وے ایم تھری پر 80کلو میٹر سے کم رفتار پر چلنے والی لائٹ ٹرانسپورٹ وہیکلز کے بھی چالانات کر دیئے جائیں گے۔ انہوںنے بتا یا کہ جس طرح موٹر وے پر 120کلو میٹر فی گھنٹہ سے زائد سپیڈ خطرناک ہے اسی طرح 80کلو میٹر سے کم رفتار میں سفر کرنے والی گاڑیاں بھی خطرے سے خالی نہیں۔