بھارتی تامل اداکارہ پونم کورنے دورہ پاکستان کے دوران بنائی گئی مختصر دورانیے کی دستاویزی فلم ریلیز کردی

نئی دہلی(اُردو پوائنٹ اخبارتازہ ترین - این این آئی۔ 14 دسمبر2018ء) بھارتی تامل اداکارہ پونم کورنے دورہ پاکستان کے دوران بنائی گئی مختصر دورانیے کی دستاویزی فلم ریلیز کردی ہے، جس میں کرتاپور راہداری کھولنے کے فیصلے کو دونوں ملکوں کے درمیان امن کا راستہ قرار دیا گیا ہے۔میڈیارپورٹ کے مطابق 12 برس سے تامل فلموں میں کام کرنے والی پونم کور نے گذشتہ ماہ 21 سے 30 نومبر تک پاکستان کادورہ کیا تھا۔

اس دوران پونم کور نے 28 نومبر کو کارتارپور راہداری کھولنے کی تقریب میں بھی شرکت کی اور گوردواروں پر حاضری دی تھی۔ اسی موقع پر انہوں نے ایک نان کمرشل فلم بنائی جس میں دنیا بھر میں سکھ مذہب سے تعلق رکھنے والوں کو پیغام دیا گیا کہ وہ پاکستان ضرور آئیں۔اے واک وِد پونم کپور نامی یہ دستاویزی فلم 4 منٹ 36 سیکنڈ پر مشتمل ہے جس میں انہوں نے وزیراعظم عمران خان کو پاکستان کی پہچان قرار دیا اور سابق بھارتی کرکٹر و ریاستی وزیر نوجوت سنگھ سدھو سے محبت کا بھی اظہار کیا۔

(جاری ہے)

پونم نے شاعر مشرق علامہ اقبال کے ایک شعر کے ذریعے بھی اپنے پیغام کو اجاگر کیا’پھر اٹھی آخر صدا توحید کی پنجاب سے، ہند کو ایک مرد کامل نے جگایا ہے خواب سے۔ کرتارپور راہداری کھولنے کے اقدام کے بعد پونم کور کے مطابق یقین ہے کہ عمران خان دونوں ملکوں کے تعلقات میں بہتری چاہتے ہیں۔اداکارہ نے ایک ٹوئٹر پیغام میں عمران خان کا شکریہ ادا کرتے ہوئے کہا کہ اللہ نے انہیں پاکستان کو بدلنے کا موقع دیا ہے، میں دل سے چاہتی ہوں کہ وہ اس میں کامیاب ہوں، آپ صحیح کہتے ہیں کہ ماضی میں رہنے سے اچھا ہے کہ ہم آج بدلیں، ہماری آنے والی نسل کیلئے۔تامل اداکارہ کے مطابق پاک بھارت سرحد خون سے بہت رنگین ہوچکی ہے، اب وقت ہے کہ اسے محبت کے پھولوں سے آباد کیا جائے۔