مکیش امبانی کی بیٹی ایشا امبانی کے شادی میں امیتابھ بچن اور عامر خان سمیت بالی وڈ اسٹارز نے کھانا پیش کیا

امیتابھ بچن ، عامر خان اور ایشوریا رائے کی مہمانوں کو کھانا پیش کرنے کی تصاویر سوشل میڈیا پر وائرل

Sumaira Faqir Hussain سمیرا فقیرحسین ہفتہ 15 دسمبر 2018 14:06

مکیش امبانی کی بیٹی ایشا امبانی کے شادی میں امیتابھ بچن اور عامر خان ..
بھارت (اُردو پوائنٹ تازہ ترین اخبار۔ 15 دسمبر 2018ء) : بھارت کے ارب پتی تاجر مکیش امبانی کی صاحبزادی ایشا امبانی شادی کے بندھن میں بندھ گئیں۔ ایشا امبانی کی شادی میں عزیز و اقارب سمیت نامور ارب پتی شخصیات، سیاستدانوں، کھلاڑیوں اور بالی وڈ اسٹارز نے بھی شرکت کی اور چار چاند لگا دیئے۔اس مہنگی ترین شادی میں آئے مہمانوں کو کھانا پیش کرنے کے لیے ویٹرز کی نہیں بلکہ بالی وڈ استاروں کی ڈیوٹی لگائی گئی۔

سوشل میڈیا پر وائرل ہونے والی ویڈیوز میں دیکھا گیا کہ بالی وڈ کے لیجنڈری اداکار امیتابھ بچن ، مسٹر پرفیکشنسٹ عامر خان اور بالی وڈ کی خوبرا اداکارہ ایشوریا رائے نے تقریب میں آئےمہمانوں کو کھانا پیش کیا اور خود ہی مہمانوں کو کھانا سرو کیا۔ اس حوالے سے امتیابھ بچن کی ایک ویڈیو بھی سوشل میڈیا پر وائرل ہوئی جس میں انہیں مہمانوں کو کھانا سرو کرتے ہوئے دیکھا گیا ۔

(جاری ہے)



 جبکہ عامر خان کی بھی ایسی ہی ایک ویڈیو وائرل ہوئی جس میں وہ مہمانوں کو کھانا سرو کر رہے تھے۔



بالی وڈ کی خوبرو اداکارہ اور بچن خاندان کی بہو ایشوریا رائے بچن نے بھی تقریب میں شریک مہمانوں کو کھانا سرو کیا۔

یہ تصاویر وائرل ہونے پر سوشل میڈیا صارفین کا کہنا ہے کہ پیسے سے سب کچھ خریدا جا سکتا ہے۔ بالی وڈ ستارے جن میں اپنے رتبے اور شہرت کی وجہ سے تھوڑی اکڑ ہوتی ہے ، اس شادی میں اُن تمام سینئیر فلمسٹارز نے بھی مہمانوں کے آگے کھانا پیش کرتے ہوئے کوئی شرم یا ہتک محسوس نہیں کی۔ ایشا امبانی کی شادی میں دنیا بھر سے مہمان شرکت کے لیے بھارت پہنچے، جن میں امریکہ کی سابق خاتونِ اول ہیلری کلنٹن اور مشہور امریکی گلوکارہ بیونسے بھی شامل تھیں۔

علاوہ ازیں امیتابھ بچن، شاہ رخ خان، عامر خان، انیل کپور، ریکھا، مادھوری ڈکشت، روینہ ٹنڈن، عالیہ بھٹ، کرن جوہر اور دیگر بالی وڈ ستارے بھی شریک تھے۔شادی میں بالی وڈ کے نوبیاہتا جوڑے پریانکا نک جونس اور دپیکا رنویر بھی سب کی توجہ کا مرکز بنے۔  شادی کی تقریبات میں ملکی اور غیر ملکی مہمانوں کو پہنچانے کے لیے 100 چارٹرڈ طیاروں کی خدمات حاصل کی گئیں جبکہ کئی فائیو اسٹار ہوٹلز بھی بُک کروائے گئے تھے۔

اس شادی کو گذشتہ 35 برسوں میں ہونے والی مہنگی ترین شادی قرار دیا جارہا ہے جس میں پیسہ پانی کی طرح بہایا گیا۔
ایک اندازے کے مطابق ایشا امبانی کی شادی پر آنے والے اخراجات کا تخمینہ تقریباً دس کروڑ ڈالر (14 ارب پاکستانی روپی) لگایا گیا ہے۔ ایشا امبانی کی شادی کے کارڈ کی ویڈیوز سوشل میڈیا پر وائرل ہوئیں جس کو دیکھ کر ہر سوشل میڈیا صارف دنگ رہ گیا۔

ویڈیو میں دیکھا گیا کہ ایشا امبانی کی شادی کا دعوت نامہ عام دعوت ناموں جیسا ہرگز نہیں تھا بلکہ اسے ایک خوبصورت ڈبے میں پیک کیا گیا جس کے کئی حصے تھے۔ اس باکس کو کھولنے میں 5 منٹ سے زیادہ وقت لگا۔ باکس کھولتے ہی سب سے اُوپر ڈائری نُما دعوت نامہ موجود ہے جس کے 5 سے زیادہ صفحات تھے، ان صفحات پر شادی کی تقریبات کی تفصیلات درج تھیں۔

اسی ڈائری نُما دعوت نامے میں ایشا امبانی اور ان کے منگیتر آنند پیرامل نے اپنی شادی میں شرکت کرنے والے مہمانوں کے لیے ایک خط بھی لکھا۔ ڈائری کے نیچے 4 چھوٹے چھوٹے ڈبے تھے جنہیں سونے سے تیار کیا گیا ہے۔ ان ڈبوں میں مہمانوں کے لیے سونے کی مالائیں موجود ہیں۔ میڈیا رپورٹ کے مطابق ایشا امبانی کی شادی کے دعوت نامے کی مالیت 3 لاکھ بھارتی روپے ہے جو پاکستانی کرنسی میں تقریباً 5 لاکھ بنتی ہے۔



ایشا امبانی کو اپنی شادی میں تحفے کے طور پر 452 کروڑ کا بنگلہ ملا،ایشا امبانی کے شوہر پیرمال نے 6 سال قبل بھارت یونی لیور لمیٹڈ سے یہ بنگلہ خریداتھا۔ یہ عالیشان بنگلہ 50 ہزارمربع فٹ رقبے پر پھیلا ہوا ہے، اس میں تزئین و آرائش کا کام آخری مرحلے میں ہے۔ ایشا کے سسراجے پرمان بھارت کے بڑے بزنس مین سمجھے جاتے ہیں جن کے بھارت اور دیگر ممالک میں پھیلے کاروبارکی مالیت 10 ارب ڈالر ہے۔