لاہور چیمبر کاصنعتوں کو بجلی کنکشن کے حصول کیلئے الگ پورٹل متعارف کروانے کا مطالبہ

لاہور۔14 دسمبر(اُردو پوائنٹ اخبارتازہ ترین - اے پی پی۔ 17 دسمبر2018ء) لاہور چیمبر کے صدر نے حکومت کو تجویز دی ہے کہ صنعتوں کو بجلی کے کنکشن کے حصول کیلئے ایک الگ پورٹل متعارف کرائی جائے جہاں بجلی کے کنکشن حاصل کرنے کیلئے درخواستیں و دیگر دستاویزات فراہم کی جاسکیں،یہ پورٹل سکیورٹیز اینڈایکسچینج کمیشن آف پاکستان، لینڈ ریکارڈ مینجمنٹ انفارمیشن سسٹم اورنادرا ڈیٹا بیس کے ساتھ منسلک ہوتاکہ درخواست دہندہ انڈسٹری کوائف کی فوری تصدیق کروا سکے، جمعہ کو جاری ایک بیان میں لاہور چیمبر کے صدر نے کہا کہ بجلی کے کنکشن کا حصول کوئی معمولی معاملہ نہیں، یہ ایک اہم اکنامک انڈیکیٹر ہے جس کی بہتری یا خرابی براہِ راست معاشی کارکردگی پر اثراندازہوتی ہے، عالمی منڈی میں مدمقابل ممالک کا مقابلہ کرنے کے لیے اس انڈیکیٹر کو ہر حال میں بہتر کرنا ہوگا، انہوں نے کہا کہ مجوزہ پورٹل پرکریڈٹ،ڈیبٹ کارڈ اور موبائل بینکنگ کے ذریعے فیس ادائیگی کی سہولت بھی مہیا کی جائے، مزید یہ کہ تصدیق شدہ سیفٹی انسپکشن رپورٹ اور ڈیمانڈ نوٹس بھی پورٹل کے ذریعے ہی جاری کیے جائیں، انہوں نے لیسکو پر زور دیا کہ وہ نجی شعبے کے سرٹیفائیڈ اور رجسٹرڈ کنٹریکٹرزکی تیار کی گئی انٹرنل وائرنگ رپورٹ کو قبول کرے جبکہ رپورٹ دس دن کے اندر پورٹل پر جاری کردی جائے،لاہور چیمبر کے صدر نے حکومت، وزارت پانی وبجلی اور دیگر متعلقہ اداروں سے مطالبہ کیا ہے کہ صنعتوں کے لیے بجلی کاحصول آسان تر بنایا جائے کیونکہ اس سلسلے میں طویل طریقہ کارکاروباری لاگت میں اضافہ کررہا ہے، مینوفیکچرنگ سیکٹر کی ترقی میں بجلی کا کردار بہت اہم ہے،ماضی کی نسبت آج بجلی کی پیداوار بہت بہتر ہے لیکن صنعتوں کے لیے بجلی کے کنکشن کا حصول تاحال بہت بڑا مسئلہ ہے، الماس حیدر نے کہا کہ بجلی کے صنعتی کنکشن حاصل کرنے کے لیے ان مجوزہ اقدامات پرعملدرآمد سے صنعتی شعبہ کو بہت بڑی سہولت میسر آئے گی،کاروبار میں آسانی پیدا ہوگی، لاگت کم اور پیداواری سرگرمیوں کو فروغ حاصل ہوگا۔