ضابطہ اخلاق کی خلاف ورزی پر عائد جرمانہ معاف کرنے کی چوہدری پرویز الہٰی اور حسین الہٰی کی استدعا مسترد

پیر 7 جنوری 2019 14:49

اسلام آباد (اُردو پوائنٹ اخبارتازہ ترین - این این آئی۔ 07 جنوری2019ء) الیکشن کمیشن آف پاکستان نے انتخابی مہم کے دوران ضابطہ اخلاق کی خلاف ورزی پر عائد کیا جانے والا جرمانہ معاف کرنے کی چوہدری پرویز الہٰی اور چوہدری حسین الہٰی کی استدعا مسترد کر دی ۔پیر کو الیکشن کمیشن میں انتخا بی مہم کے دوران ضابطہ اخلاق کی خلاف ورزی پر جرمانہ عائد کئے جا نے سے متعلق کیس کی سماعت چیف کمشنر کی سربراہی میں تین رکنی کمیشن نے کی ۔

سماعت کے دوران چوہدری پرویز الٰہی کی طرف سے ان کے وکیل پیش ہوئے اور موقف اپنایا کہ نہ میں نے پینا فلیکس لگایا نہ میرا قصور ہے ،ڈپٹی کمشنر گجرات نے مجھ پر پانچ ہزار جرمانہ کیا ۔

(جاری ہے)

چیف الیکشن کمشنر نے استفسار کیا کہ حمید اللہ بھٹی کون ہے وکیل نے جواب دیا ہمارا اس سے کوئی تعلق نہیں ،ْ جرمانہ مجھے کیا گیا ہے لیکن میں پیش نہیں ہوا ،چیف الیکشن کمشنر نے کہا کہ آپ کی جگہ حمید اللہ بھٹی پیش ہوا تو آپ نے اس کے خلاف کوئی کاروائی نہیں کی ممبر سند ھ عبدالغفار سومرو نے کہا کہ آپ نے 5ہزار روپے جمع کرائے ہیں جس پر وکیل نے نفی میں جواب دیا ، چیف الیکشن کمشنر نے کہاکہ آپ کو اس سے پہلے بھی دو مرتبہ وارننگ دی گئی ، نہ آپ کو وارننگ کا علم ہے نہ حمیداللہ بھٹی کا علم ہے یہ تو بہت سادگی والی بات ہے،سماعت کے دوران چوہدری حسین الہی پر عائدکئے گئے جرمانوں کے معاملے پر بھی ان کے وکیل نے دلائل دیئے ، تاہم الیکشن کمیشن نے درخواست گزاروں کی استدعا مسترد کر دی ۔