منہاج القرآن قرآن و سنت کی تعلیمات کے فروغ کی عالمگیر تحریک ہے : ڈاکٹر طاہر القادری

قرآنی انسا ئیکلو پیڈیا کی طرح رواں سال 20ہزار احادیث پر مشتمل انسائیکلو پیڈیا کی تقریب رونمائی ہو گی

ہفتہ جنوری 22:43

منہاج القرآن قرآن و سنت کی تعلیمات کے فروغ کی عالمگیر تحریک ہے : ڈاکٹر ..
لاہور (اُردو پوائنٹ اخبارتازہ ترین۔ 12 جنوری2019ء) قائد تحریک منہاج القرآن ڈاکٹر محمد طاہر القادری نے کہا ہے کہ منہاج القرآن قرآن و سنت کی تعلیمات کے فروغ کی عالمگیر تحریک ہے۔ قرآنی انسا ئیکلو پیڈیا کی تالیف کے بعد رواں سال کے اختتام پر20ہزار احادیث مبارکہ پر مشتمل جامع انسائیکلو پیڈیا کی تقریب رونمائی ہو گی۔ منہاج القرآن کے پلیٹ فارم سے نا بینا افراد کے مطالعہ قرآن و سنت کیلئے خصوصی کتب تیار کرنے کے پراجیکٹ پر بھی کام ہو گا۔

ان خیالات کا اظہار انہوں نے منہاج القرآن شمالی پنجاب کی تنظیم سے خصوصی ملاقات کے دوران کیا۔اس موقع پر نائب ناظم اعلیٰ شمالی پنجاب علامہ رانا محمد ادریس بھی موجود تھے۔اجلاس میں آزاد کشمیر،گلگت بلتستان ،شمالی پنجاب کے اضلاع،جہلم،چکوال،اٹک،راولپنڈی،سرگودھا،میانوالی کی تنظیموں کے عہدیداروں،علمائے کرام نے شرکت کی۔

(جاری ہے)

ڈاکٹر طاہر القادری نے کہا کہ منہاج القرآن تمام مسالک کو قرآن و سنت کی بنیاد پر ایک پلیٹ فارم پر اکٹھا کرنے کے مشن پر گامزن ہے۔

الحمد اللہ منہاج القرآن کے دینی،روحانی پروگرامز میں تمام مسالک کے جید علمائے کرام،مشائخ عظام کو بطور خاص شرکت کی دعوت دی جاتی ہے اور یہ اللہ کا فضل و کرم ہے کہ تمام مسالک کے علمائے کرام منہاج القرآن کے پلیٹ فارم پر بخوشی شریک ہوتے ہیں۔انہوں نے کہا کہ قرآن کے لاتفرقو کے پیغام کو لے کر دنیا کے گوشے گوشے میں جا رہے ہیں۔فرقہ واریت کی آڑ میں اسلام،پاکستان اور عالم اسلام کے دشمن سازشیں کرتے ہیں۔

ہم فرقہ واریت کے وائرس کو جڑ سے ختم کر کے انسانیت سے محبت کے نبوی پیغام کو عام کرنے کے مشن پر گامزن رہیں گے۔ڈاکٹر طاہر القادری نے کہا کہ علم ،امن اور محبت کی اس عالمگیر تحریک میں منہاج القرآن کے علماء،سکالرز،منہاج ویمن لیگ،مصطفوی سٹوڈنٹس موومنٹ،منہاج یوتھ لیگ ہر اول دستہ ہیں۔ڈاکٹر طاہر القادری نے کہاکہ منہاج القرآن کی تمام ضلعی تنظیمیں قرآنی انسائیکلو پیڈیا کی تقاریب رونمائی منعقد کر کے قرآن فہمی کے ضمن میں اپنا دینی کردار ادا کریں۔

علامہ رانا محمد ادریس نے خطاب کرتے ہوئے کہا کہ 2فروری کوجہلم اور 3فروری کو چکوال میں قرآنی انسائیکلو پیڈیا کے حوالے سے تقاریب منعقد کی جائینگی۔قائد تحریک منہاج القرآن نے تقریب میں شریک رہنمائوں کو منہاج القرآن کی لائف ممبر شپ کی اسناد بھی دیں۔