ولیمز سسٹرز، پلسکووا، بوچرڈ، سویتولینا نے آسٹریلین اوپن ٹینس ویمنز سنگلز دوسرے رائونڈ میں جگہ بنا لی، ہالپ بھی اپ سیٹ شکست سے بال بال بچ گئیں، آزارینکا کو شکست

منگل 15 جنوری 2019 20:13

میلبورن ۔ (اُردو پوائنٹ اخبارتازہ ترین - اے پی پی۔ 15 جنوری2019ء) ولیمز سسٹرز، سیمونا ہالپ، کیرولینا پلسکووا، یوجینی بوچرڈ، ایلینا سویتولینا اور ایلیز کورنیٹ نے فاتحانہ آغاز کرتے ہوئے سال کے پہلے گرینڈ سلام ٹینس ٹورنامنٹ آسٹریلین اوپن ویمنز سنگلز دوسرے رائونڈ میں جگہ بنا لی۔

(جاری ہے)

منگل کو کھیلے گئے ویمنز سنگلز پہلے رائونڈ میچز میں شہرہ آفاق امریکن سٹار سرینا ولیمز نے حریف جرمن کھلاڑی ماریا کو ہرا کر دوسرے رائونڈ تک رسائی حاصل کی، وینس ولیمز بھی پہلی رکاوٹ عبور کرنے میں کامیاب رہیں، انہوں نے رومانوی کھلاڑی بوزرنیسکو کو زیر کیا، عالمی نمبر ایک رومانوی کھلاڑی سیمونا ہالپ نے کایا کنیپی کو شکست دے کر ایونٹ سے باہر کر دیا، یوکرینی کھلاڑی ایلینا سویتولینا نے گلوبک کو ہرا کر دوسرے رائونڈ میں جگہ بنائی، جمہوریہ چیک کی کیرولینا پلسکووا نے ہم وطن کھلاڑی کو شکست دے کر دوسرے رائونڈ کیلئے کوالیفائی کیا، میڈیسن کیز نے آسٹریلوی کھلاڑی آئیوا کو ہرا کر ایونٹ سے باہر کر دیا، ایلیز مرٹنز بھی پہلی آزمائش میں سرخرو رہیں، انہوں نے اینا کیرولینا کو زیر کیا۔

وکٹوریہ آزارینکا پہلے رائونڈ میں شکست کے بعد ایونٹ سے باہر ہو گئیں۔