گوگل نے راتوں رات پاکستانی روپے کی قدر بڑھا دی ،چند گھنٹوں بعد غلطی درست کرلی

نیویارک (اُردو پوائنٹ اخبارتازہ ترین - این این آئی۔ 16 جنوری2019ء) معروف سرچ انجن گوگل نے راتوں رات پاکستانی کرنسی کی قدر بڑھا دی اور ڈالر، یورو، ریال اور اماراتی درہم سمیت غیر ملکی کرنسی کے غلط ریٹس دکھانے لگا، تاہم میڈیا پر خبر نشر ہوئی تو چندگھنٹوں بعد ہی غلطی درست کرلی گئی۔میڈیا رپورٹ کے مطابق گذشتہ برس نومبر میں ایک ہی دن میں ڈالر کی قدر میں ریکارڈ اضافہ ہوا تھا تاہم گذشتہ رات گوگل نے ڈالر کی قدر میں کمی کے سب ریکارڈ توڑ ڈالے۔

(جاری ہے)

مارکیٹ میں ڈالر کی قیمت 139 روپے رہی لیکن سرچ انجن ڈالر کی قیمت صرف 76 روپے 25 پیسے پر لے آیا۔ ڈالر کے علاوہ گوگل کرنسی کنورٹر پر امارتی درہم 20 روپے 76 پیسے اور سعودی ریال 20 روپے 33 پیسے کا نظر آیا جبکہ گوگل کے مطابق ایک یورو 87 روپے 3 پیسے کا خریدا جاسکتا تھا۔گوگل نے اسی طرح ہر کرنسی کے مقابلے میں پاکستانی کرنسی کی شرح بڑھا دی۔ گوگل کے کرنسی کنورٹر پر پاکستانی روپے اور دیگر کرنسیوں کے شرح مبادلہ کے غلط نتائج پروگرامنگ کی غلطی کا نتیجہ ہوسکتے ہیں تاہم یہ کارنامہ سوشل میڈیا پر وائرل ہونے سے لوگ ضرور تجسس میں مبتلا ہوگئے اور شاید ڈالر جمع کرنے والوں کو ایک لمحے کو جھٹکا بھی لگا ہوکہ ہم تو لٹ گئے۔