جعلی ادویات سے گندہ بیوپار نہیں ہو سکتا، لعنت ہے ایسے لوگوں پر جو جعلی ادویات بناتے ہیں ، چیف جسٹس ثاقب نثار

قیمتوں میں اضافے کی رپورٹ دیکھ لی ہے،ڈریپ کو جعلی ادویات کے خلاف ایکشن کے لیے کیا تحفظ چاہیی چیف جسٹس

بدھ 16 جنوری 2019 15:40

اسلام آباد (اُردو پوائنٹ اخبارتازہ ترین - این این آئی۔ 16 جنوری2019ء) سپریم کور ٹ آف پاکستان کے چیف جسٹس پاکستان میاں ثاقب نثار نے کہا ہے کہ لعنت ہے ایسے لوگوں پر جو جعلی ادویات بناتے ہیں ۔ بدھ کو ادویات کی قیمتوں میں اضافے سے متعلق کیس کی سپریم کورٹ آف پاکستان میں سماعت ہوئی جس کے دوران ڈریپ کے نمائندے نے ادویات کی قیمتوں میں اضافے کی رپورٹ عدالت میں پیش کر دی ہے۔

(جاری ہے)

چیف جسٹس آف پاکستان نے استفسار کیا کہ قیمتوں میں اضافے کی رپورٹ دیکھ لی ہے،ڈریپ کو جعلی ادویات کے خلاف ایکشن کے لیے کیا تحفظ چاہیی ڈریپ حکام نے عدالت کو بتایا کہ ایورسٹ کمپنی کے خلاف 73 ایف آئی آرز کا اندراج ہو چکا ہے۔چیف جسٹس نے اپنے ریمارکس میں کہا کہ جعلی ادویات سے گندہ بیوپار نہیں ہو سکتا، لعنت ہے ایسے لوگوں پر جو جعلی ادویات بناتے ہیں۔عدالت نے کہا کہ نیب اور ایف آئی اے ڈریپ کے خلاف براہ راست ایکشن نہیں لیں گے، تحقیقاتی ایجنسی سربراہان ڈریپ کے خلاف شکایت کا جائزہ لیں، تحقیقاتی ایجنسی اٹارنی جنرل کی مشاورت سے ایکشن لیں۔چیف جسٹس ثاقب نثار نے اپنے ریمارکس میں کہا کہ جعلی ادویات ناسور ہیں، جعلی ادویات کے بیوپار میں ملوث شخص پر لعنت ہے۔