کراچی،نہر خیام کے پشتے پر تعمیر عمارت کو مسمار کرنے کے لئے آپریشن جاری

بدھ 16 جنوری 2019 23:45

کراچی۔ (اُردو پوائنٹ اخبارتازہ ترین - اے پی پی۔ 16 جنوری2019ء) سپریم کورٹ کے احکامات پر بلدیہ عظمیٰ کراچی کے محکمہ انسداد تجاوزات کے سینئر ڈائریکٹر بشیر صدیقی کی نگرانی میں کلفٹن بلاک5- نہر خیام کے پشتے پر تقریباً ڈھائی ایکڑ پر تعمیر کی جانے والی عمارت کو مسمار کرنے کے لئے منگل کو شروع کیا جانے والا آپریشن بدھ کے روز بھی جاری رہا جس کے دوران بھاری مشینری کے ذریعے عمارت کی پلنتھ اور پلر کو مسمار کرنے کی کارروائی جاری ہے جبکہ ناصر جمپ کورنگی تا چمڑا چورنگی میں بھی غیرقانونی طور پر قائم کی گئی دکانیں، کیبن، چبوترے اور پتھارے مسمار کردیئے گئے۔

جاری کردہ اعلامیہ کے مطابق آپریشن کی نگرانی ڈائریکٹر لینڈ ڈسٹرکٹ کورنگی مسرت علی خان نے کی۔ اس موقع پر کسی بھی ناخوشگوار واقعہ سے نمٹنے کے لئے علاقے کے اسسٹنٹ کمشنر رینجرز، پولیس اور سٹی وارڈنز کی نفری بھی موجود تھی۔

(جاری ہے)

علاوہ ازیں لیاقت آباد، بفرزون اور نارتھ ناظم آبادمیں سڑکوں اور فٹ پاتھوں پر قائم کئے گئے دسترخوان کو ہٹانے کے لئے مختلف فلاحی اداروں کو نوٹس جاری کئے گئے۔ نوٹس میں کہا گیا ہے کہ ادارے یہاں سے اپنا سامان ہٹا لیں بصورت دیگر کارروائی کرکے سامان کو ضبط کرلیا جائے گا۔ انسداد تجاوزات کے عملے نے علاقے میں لائوڈ اسپیکر کے ذریعے بھی اعلان کرکے ان اداروں کو آگاہ کیا۔