Live Updates

پی ٹی آئی کی حکومت معیشت کی بحالی کیلئے اہم اقدامات کر رہی ہی ، حکومت صنعتی، تجارتی اور سماجی شعبے کی ترقی کیلئے ترجیحی بنیادوں پر کام کر رہی ہے

وزیراعظم کے ترجمان ندیم افضل چن کا انٹرویو

جمعرات 17 جنوری 2019 01:50

اسلام آباد ۔ (اُردو پوائنٹ اخبارتازہ ترین - اے پی پی۔ 17 جنوری2019ء) وزیراعظم کے ترجمان ندیم افضل چن نے کہا ہے کہ پی ٹی آئی کی حکومت معیشت کی بحالی کیلئے اہم اقدامات کر رہی ہے اور ملک کے صنعتی، تجارتی اور سماجی شعبے کی ترقی کیلئے ترجیحی بنیادوں پر کام کر رہی ہے۔ بدھ کو ایک انٹرویو میں انہوں نے کہا کہ حکومت کاروباری طبقے کیلئے سازگار اور دوستانہ ماحول کو یقینی بنانے کیلئے اہم کردار ادا کر رہی ہے اور اس سلسلے میں طویل اور قلیل المدت پالیسیاں بنائی جا رہی ہیں۔

انہوں نے کہا کہ پاکستان مسلم لیگ (ن) نے اپنے ادوار میں قومی اداروں کی نجکاری کرتے ہوئے ملک کی معیشت کو شدید نقصان پہنچایا۔ انہوں نے کہا کہ عام انتخابات 2018ء وہ پہلے الیکشن تھے جو صاف اور شفاف طور پر منعقد ہوئے اور کسی ادارے نے ان میں مداخلت نہیں کی۔

(جاری ہے)

انہوں نے کہا کہ پی ایم ایل (ن) کی قیادت نے جنرل (ر) جیلانی کے تعاون سے اپنے سیاسی کیریئر کا آغاز کیا۔

ایک سوال کے جواب میں وزیراعظم کے ترجمان نے کہا کہ ملک کو آج جن مسائل کا سامنا ہے یہ ماضی کی حکومتوں کی غلط پالیسیوں کا نتیجہ ہے۔ ملک کی معاشی خرابی کی ذمہ دار پی ٹی آئی کی حکومت نہیں ہے۔ ندیم افضل چن نے کہا کہ پاکستان مسلم لیگ (ن) نے پی آئی اے، سٹیل مل اور دوسرے قومی اداروں کو تباہ کیا اور قومی خزانے کو اربوں کا نقصان پہنچایا۔ کراچی اور دیگر شہروں میں ایم کیو ایم کے دفاتر کھولنے سے متعلق سوال کے جواب میں انہوں نے کہا کہ ایم کیو ایم ایک جمہوری پارٹی ہے اور انہیں اپنی سیاسی سرگرمیاں کرنے کا حق حاصل ہے۔

پی ٹی آئی کی قیادت دونوں جماعتوں کے مابین ترقیاتی منصوبوں پر تعاون کی خواہاں ہے۔ انہوں نے کہا کہ حکومت عوام کو درپیش مسائل سے پوری طرح آگاہ ہے اور ان کے حل کیلئے اپنا بھرپور کردار ادا کرے گی اور عوام کے مسائل کو ترجیحی بنیادوں پر حل کیا جائے گا۔ ایک اور سوال کے جواب میں انہوں نے کہا کہ ملک میں عدالتیں آزاد ہیں او ر آزادانہ طور پر اپنا فیصلہ دے رہی ہے۔ انہوں نے کہا کہ وزیراعظم عمران خان ملک کے ساتھ انتہائی مخلص ہیں اور عام آدمی کا معیار زندگی بلند کرنے کیلئے بہت سے اقدامات کر رہے ہیں۔
Live عمران خان سے متعلق تازہ ترین معلومات