راولپنڈی: فلیٹ میں گیس لیکج کے باعث دھماکا، جھلس کر 3 افراد جاں بحق

ہفتہ 19 جنوری 2019 19:51

راولپنڈی(اُردو پوائنٹ اخبارتازہ ترین - آن لائن۔ 19 جنوری2019ء) راولپنڈی کے علاقے ڈھوک چوہدریاں میں رہائشی فلیٹ میں علی الصبح گیس لیکج سے دھماکہ ہوا جس کے بعد فلیٹ میں آگ لگ گئی، آتشزدگی کے باعث 2 خواتین سمیت 3 افراد جھلس کر جاں بحق ہو گئے۔ ریسکیو 1122 ترجمان کے مطابق ڈھوک چوہدریاں فلیٹ میں گیس لیکج سے دھماکہ ہوا اور آگ لگی، آگ سے جھلس کر 2 خواتین سمیت 3 افراد جاں بحق ہوئے۔

جاں بحق ہونے والوں میں آرمی پبلک سکول کی ٹیچرشبنم کیانی، اے پی ایس کا طالبعلم فہد کیانی اور 50 سالہ حمیرا نشاط شامل ہیں۔

(جاری ہے)

ریسکیو 1122 کی ٹیموں نے موقع پر پہنچ کر آگ پر قابو پایا اور لاشوں کو پوسٹ مارٹم کے لیے ڈسٹرکٹ ہیڈ کوارٹرز ہسپتال منتقل کر دیا ہے، تھانہ ائیرپورٹ پولیس نے بتایا کہ متاثرہ فلیٹ میں صرف 3 افراد ہی رہائش پذیر تھے جو اس افسوسناک واقعہ میں جاں بحق ہو گئے۔

ابتدائی تحقیقات کے مطابق فلیٹ میں گیس لوڈ شیڈنگ کی وجہ سے چولہے کا والوو کھلا رہ گیا تھا، رات بھر گیس لیک ہوتی رہی صبح ناشتے کی تیاری کے لیے ماچس جلائی گی تو زوردار دھماکہ ہوگیا۔ جس کے نتیجیمیں آگ لگ گئی۔ پولیس نے ابتدائی تحقیقات مکمل کرلی ہیں، واقعہ میں جاں بحق ہونے والے تینوں افراد کا تعلق گوجر خان کے علاقے سکھو سے ہے۔