جنوبی افریقہ اور پاکستان کی ٹیمیں دوسرے ون ڈے انٹرنیشنل میچ میں (کل)آمنے سامنے ہوں گی، شاہینوں کو پانچ میچوں کی سیریز میں 1-0 کی برتری حاصل، سرفراز الیون برتری دوگنی کرنے کیلئے پر جوش، میچ پاکستانی وقت کے مطابق شام 4 بجے شروع ہو گا

ڈربن ۔ (اُردو پوائنٹ اخبارتازہ ترین - اے پی پی۔ 20 جنوری2019ء) جنوبی افریقہ اور پاکستان کی کرکٹ ٹیموں کے درمیان پانچ ایک روزہ بین الاقوامی میچوں پر مشتمل سیریز کا دوسرا میچ (کل) منگل کو ڈربن میں کھیلا جائے گا، شاہینوں کو سیریز میں 1-0 کی برتری حاصل ہے، سرفراز الیون نے پہلے میچ میں پروٹیز کو 5 وکٹوں سے شکست فاش سے دوچار کیا تھا، میچ پاکستانی وقت کے مطابق شام 4 بجے شروع ہو گا۔

(جاری ہے)

پہلے ون ڈے میں شاندار فتح کے بعد پاکستانی کھلاڑیوں کے حوصلے بلند ہیں اور وہ دوسرا میچ جیت کر سیریز میں برتری دوگنی کرنے کیلئے پر جوش دکھائی دے رہے ہیں تاہم دوسری جانب شکست خوردہ میزبان ٹیم بھی سیریز میں کم بیک کرنے کیلئے پر اعتماد ہے اسلئے دوسرے ون ڈے میں دونوں ٹیموں کے درمیان دلچسپ مقابلے کی توقع کی جا رہی ہے۔ دونوں ٹیموں کے درمیان تیسرا ون ڈے 25 جنوری، چوتھا ون ڈے 27 جنوری جبکہ پانچواں اور آخری ایک روزہ میچ 30 جنوری کو کھیلا جائے گا۔ اس کے بعد دونوں ٹیموں کے درمیان تین ٹی ٹونٹی انٹرنیشنل میچوں کی سیریز کھیلی جائے گی۔