کراچی میں گاڑی پر فائرنگ، کے ڈی اے ملازم جاں بحق

وزیراعلی سندھ نے واقعے کا نوٹس لیتے ہوئے ایڈیشنل آئی جی سندھ پولیس سے رپورٹ طلب کرلی

منگل 22 جنوری 2019 21:00

کراچی(اُردو پوائنٹ اخبارتازہ ترین - این این آئی۔ 22 جنوری2019ء) کراچی کے علاقے پی ای سی ایچ ایس سوسائٹی میں کار پر فائرنگ کے نتیجے میں کراچی ڈیویلپمنٹ اتھارٹی(کے ڈی ای)کا ملازم جاں بحق ہوگیا۔ایس پی جمشید ڈویژن شمائل ریاض کے مطابق ہلاک ہونے والے شخص کو سر میں گولی لگی۔فائرنگ کا واقعہ طیبہ مسجد کے قریب پیش آیا، لاش کو اسپتال منتقل کردیا گیا ہے۔

(جاری ہے)

پولیس کے مطابق مقتول محمد علی شاہ کے ڈی اے کا ملازم ہے اور 15 گریڈ کا افسر ہے، جائے وقوعہ سے 30 بور پستول کی گولی کا خول ملا ہے۔جناح اسپتال کی شعبہ حادثات کی انچارج ڈاکٹر سیمی جمالی کے مطابق لائے جانے والے شخص کی عمر 50 سال کے قریب ہے۔انہوں نے بتایاکہ بظاہر سر میں لگنے والی گولی موت کا سبب بنی، لاش کو پوسٹ مارٹم کے لیے سرد خانے منتقل کردیا گیاہے۔وزیراعلی سندھ سید مراد علی شاہ نے واقعے کا نوٹس لیتے ہوئے ایڈیشنل آئی جی سندھ پولیس سے رپورٹ طلب کرلی ہے۔انہوں نے ہدایت دی کہ بتایا جائے کہ یہ ٹارگٹ کلنگ کا واقعہ تھا یا پھر ڈکیتی کا۔