پاکستان تحریک انصاف نے آصف علی زرداری کی نااہلی کیلئے اسلام آباد ہائیکورٹ میں درخواست دائر کردی

پیر 28 جنوری 2019 18:02

اسلام آباد ۔ (اُردو پوائنٹ اخبارتازہ ترین - اے پی پی۔ 28 جنوری2019ء) پاکستان تحریک انصاف نے آصف علی زرداری کی نااہلی کیلئے اسلام آباد ہائیکورٹ میں درخواست دائر کردی ہے۔پی ٹی آئی کے مرکزی رہنما عثمان ڈار اور خرم شیر زمان کی جانب سے دائر درخواست میں موقف اختیار کیا گیا ہے کہ آصف علی زرداری نے اپنے اثاثے چھپائے اس لیے وہ صادق اور امین نہیں رہے۔

پاکستان تحریک انصاف نے آصف علی زرداری کی نااہلی کے لیے الیکشن کمیشن سندھ میں درخواست دائر کی تھی جسے کمیشن نے واپس کردیا تھا ۔

(جاری ہے)

دائر درخواست میں مزید کہا گیا ہے کہ آصف علی زرداری حلقہ این اے 213 سے رکن قومی اسمبلی منتخب ہوئے وہ ایم این اے بننے کے اہل نہیں۔دائر درخواست میں آصف علی زرداری کو آئین کے آرٹیکل 62 ون ایف کے تحت نااہل قرار دینے کی استدعا کی گئی ہے۔واضح رہے کہ تحریک انصاف کے رہنماوں نے دعویٰ کیا ہے کہ آصف علی زرداری امریکا میں اپارٹمنٹ کے مالک ہیں جو انہوں نے کاغذات نامزدگی میں ظاہر نہیں کی۔اسلام آباد ہائی کورٹ کے رجسٹرار دفتر نے مذکورہ درخواست پر اعتراض عائد کر دیا ہے کہ دائر درخواست کے ساتھ منسلک دستیاویزات غیر واضح ہیں ۔