محکمہ لائیو اسٹاک خیبرپختونخوا کا گدھوں کے فارمز بنانے کا فیصلہ

پشاور(اُردو پوائنٹ اخبارتازہ ترین - این این آئی۔ 31 جنوری2019ء) خیبرپختونخوا کے محکمہ لائیو اسٹاک نے گدھوں کی برآمد کے منصوبے کے پیش نظر مانسہرہ اور ڈی آئی خان میں گدھوں کے فارمز بنانے کا فیصلہ کیا ہے۔محکمہ لائیو اسٹاک کے مطابق گدھوں کے فارمز غیر ملکی پارٹنر شپ سے بنائے جائیں گے جس کیلئے چینی حکومت کے ساتھ ساتھ رجسٹرڈ کمپنیوں کے ساتھ معاہدے ہوں گے۔

محکمہ لائیو اسٹاک کے مطابق گدھوں کی برآمد کے منصوبے میں رواں سال اہم پیش رفت متوقع ہے، ابتدائی مرحلہ میں بیمار، لاغر اور معذور گدھے سپلائی کریں گے۔محکمہ لائیو اسٹاک کے مطابق ابتدائی تین سال کے دوران 80 ہزار گدھے برآمد ہوں گے، فارمز میں گدھوں کی افزائش ڈھائی سے تین سال میں ہوجاتی ہے۔محکمہ لائیو اسٹاک نے دعویٰ کیا کہ چینی کمپنیاں گدھوں کے فارمز میں دلچسپی رکھتی ہیں ، غیر ملکی کمپنیاں 3 ارب ڈالرز تک سرمایہ کاری کے لیے تیار ہیں۔

(جاری ہے)

خیبرپختونخوا کے محکمہ لائیو اسٹاک کے مطابق صوبے کے 70 ہزار خاندانوں کا روزگار گدھوں سے وابستہ ہے اس لیے گدھوں کی برآمد اور فارمز کے لیے معاہدہ سوچ سمجھ کر کرنا چاہتے ہیں تاکہ صوبے میں بھی گدھوں کی کمی نہ ہو۔محکمہ لائیو اسٹاک کے مطابق گدھوں کے مختلف اجزاء ادویات اور فرنیچر کی تیار میں استعمال ہوتے ہیں اور چین میں گدھے کے بالوں کی بھی مانگ زیادہ ہے۔