پی ایس ایل4 ،ملتان سلطانز کے کھلاڑیوں کا دبئی میں پریکٹس سیشن

دبئی(اردو پوائنٹ تازہ ترین اخبار۔10 فروری 2019ء) پاکستان سپر لیگ (پی ایس ایل ) کی فرنچائز اور ”اردو پوائنٹ “ کی ٹیم ملتان سلطانز کے کھلاڑیوں نے دبئی میں اپنا پہلا پریکٹس سیشن کیا ۔ آئی سی سی کرکٹ اکیڈمی میں اس پریکٹس سیشن کے دوران کھلاڑیوں کا فٹنس لیول چیک کیا گیا اور انہیں کیچنگ پریکٹس بھی کروائی گئی ، ملتان سلطانز کے کھلاڑی اس پریکٹس سیشن سے خوب لطف اندوز ہوتے نظر آئے ۔

یاد رہے کہ ملتان سلطانز کی ٹیم گزشتہ روز ملتان ایئر پورٹ سے دبئی پہنچی تھی جسکی وجہ بتاتے ہوئے ٹیم کے مالک علی ترین کا کہنا تھا کہ جنوبی پنجاب کے شائقین کرکٹ کی وجہ سے ٹیم کو ملتان سے بھیجنا ہماری خواہش تھی ، اس لیے ہم نے پی سی بی سے درخواست کی تھی کہ ٹیم یہاں سے روانہ ہو۔میڈیا سے گفتگو میں علی ترین کا کہنا تھا کہ ہمارے پاس بہترین کھلاڑی ہیں، دعاکریں کہ وہ اچھی کارکردگی کا مظاہرہ کریں، اگر شعیب ملک اور شاہد آفریدی نے پرفارم کر لیا تو ٹرافی ملتان سلطانزکی ہی ہوگی۔

(جاری ہے)

یاد رہے کہ پاکستان کرکٹ بورڈ (پی سی بی) کے زیر اہتمام پاکستان سپر لیگ کا چوتھا ایڈیشن 14 فروری سے یو اے ای اور پاکستان میں شروع ہوگا، لیگ کا فائنل 17مارچ کو کراچی میں کھیلا جائیگا، لیگ میں 6 ٹیمیں ٹائٹل کے حصول کیلئے پنجہ آزمائی کرینگی، لیگ راﺅنڈ روبن فارمیٹ کے تحت کھیلی جائیگی۔ ابتک اسلام آباد یونائیٹڈ کی ٹیم دو دفعہ اور پشاور زلمی کی ٹیم ایک بار لیگ جیت چکی ہے۔

پاکستان سپر لیگ کا افتتاحی میچ 14فروری کو دفاعی چمپئن اسلام آباد یونائیٹڈ اور لاہور قلندرز ٹیموں کے درمیان دبئی میں کھیلا جائیگا۔ پی ایس ایل کے چوتھے ایڈیشن میں فائنل سمیت کل 34 میچز کھیلے جائیں گے جس میں سے آخری 8 میچز پاکستان کے شہروں لاہور اور کراچی میں کھیلے جائینگے۔ لاہور میں 3 میچز جبکہ فائنل سمیت پانچ میچز کراچی میں کھیلے جائینگے۔

نیشنل سٹیڈیم، کراچی میں پہلا میچ 7 مارچ کو کراچی کنگز اور پشاور زلمی کے مابین فلڈ لائٹس میں ہوگا جبکہ لاہور میں پہلامیچ 9 مارچ کو لاہور قلندر اور اسلام آباد یونائیٹڈ کے مابین کھیلا جائیگا۔ پاکستان میں کھیلے جانےوالے 8 میچز کے علاوہ دبئی انٹرنیشنل سٹیڈیم میں 14میچز اور چار میچز شیخ زید سٹیڈیم ابوظہبی میں کھیلے جائینگے۔ شیدول کے مطابق پی ایس ایل میں شرکت کرنےوالی تمام ٹیمیں ہر ٹیم کےساتھ دو دو میچز کھیلیں گی۔ جنوبی افریقہ کے اے بی ڈی ویلیئرز، زمبابوے کے برینڈن ٹیلرسمیت 19کھلاڑی پہلی بار پی ایس ایل میں ایکشن میں نظر آئینگے۔ پاکستان سپر لیگ کے چوتھے ایڈیشن کا فائنل میچ 17 مارچ کو کھیلا جائیگا جو نیشنل کرکٹ سٹیڈیم کراچی میں کھیلا جائیگا۔