امریکی مسلمان اراکین کانگرس کی اسرائیل بائیکاٹ مہم کی حمایت

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔11 فروری۔2019ء) امریکی کانگرس میں پہلی 2 مسلمان خواتین کی جانب سے اسرائیل کے بائیکاٹ کی حمایت کیے جانے سے ڈیموکریٹک پارٹی میں خلیج اور امریکا اسرائیل اتحاد میں دراڑ آنے کا خطرہ پیدا ہوگیا ہے . امریکی نشریاتی ادارے کی رپورٹ کے مطابق الہان عمر اور رشیدہ طالب نے جنوری میں ایوانِ نمائندگان میں قدم رکھا تھا اور علی الاعلان اسرائیل کے خلاف فلسطین کی بائیکاٹ تحریک اور ترک سرمایہ و پابندی (بی ڈی ایس) کی حمایت کا اعلان کیا تھا .

(جاری ہے)

مذکورہ تحریک کا آغاز ایک دہائی قبل ہوا تھا جس کی بنیاد 1960 میں افریقہ میں نسل پرستی کے خلاف چلائی جانے والی تحریک کے طرز پر رکھی گئی تھی اور لوگوں اور تنظیموں سے اسرائیل کے ساتھ اقتصادی، ثقافتی اور تعلیمی تعلقات روک دینے اور صیہونی ریاست کے خلاف پابندیاں عائد کرنے کا مطالبہ کیا گیا تھا . ڈیموکریٹک پارٹی کی رکن کانگرس رشیدہ طالب کا تعلق فلسطین سے ہے اور الہان عمر ایک صومالی مہاجر کی بیٹی ہیں .

رشیدہ طالب کا کہنا ہے کہ بی ڈی ایس سے نسل پرستی اور اسرائیل کی جانب سے کی جانے والی انسانی حقوق کی خلاف ورزیوں کی جانب توجہ مبذول ہوگی . دوسری جانب الہان عمر نے اسرائیل پر فلسطینیوں کے خلاف نسل پرستی کی طرز پر امتیازی سلوک برتنے کا الزام لگایا جو تحریک کا سبب بنا لیکن انہوں نے اس بات سے انکار کیا کہ وہ یہود دشمن ہیں . ایک انٹرویو میں انہوں نے کہا کہ جب میں اسرائیلی اداروں کے قوانین دیکھتی ہوں جس میں اسے ایک صیہونی ریاست کہا گیا ہوتا ہے اور اس میں رہنے والے دیگر مذاہب کا ذکر نہیں کیا جاتا اس کے باوجود ہم اسے مشرق وسطیٰ میں جمہوری ملک قرار دیتے ہیں؟ انہوں نے کہا کہ مجھے معلوم ہے کہ ایسا اگر ہم کہیں اور دیکھیں تو ہم تنقید کریں گے، جیسا کہ ایران پر بھی کرتے ہیں یا کسی بھی اور جگہ کو جو اپنے مذہب کو مقدم رکھتی ہے .

دونوں مسلمان ڈیموکریٹس کی جانب سے یہ تنازع ایسے وقت میں سامنے آیا ہے جب صدر ڈونلڈ ٹرمپ کی حکومت اسرائیل کے ساتھ تعلقات کے فروغ اور فلسطینیوں کی امداد روکنے پر توجہ دے رہی ہے . دوسری جانب ریپبلکن اراکین بی ڈی ایس کی اس حمایت کو یہودیوں کے لیے خطرے اور ڈیموکریٹک اراکین کے درمیان پیدا ہونے والی خلیج سے تعبیر کررہے ہیں .