سینئر اداکار آغا طالش کی برسی 19 فروری کو منائی جائے گی

جمعہ 15 فروری 2019 13:22

لاہور (اُردو پوائنٹ اخبارتازہ ترین - این این آئی۔ 15 فروری2019ء) پاکستان فلم انڈسٹری کے سینئر اداکار آغا طالش کی21ویں برسی 19 فروری بروز بدھ کو منائی جائے گی ۔ آغا طالش 1927 ء کولدھیانہ میں پیدا ہوئے۔ انکا اصل نام آغا علی عباس قز لباش اوران کا آبائی وطن مشرقی پنجاب بھارت کا شہر لدھیانہ تھا۔ تقسیم ہند سے قبل ہی انہیں فلموں میں کام کرنے کا شوق ممبئی لے گیا۔

ان کی پہلی فلم سرائے کے باہرتھی جس کے مصنف کرشن چند تھے۔آغا طالش نے تقسیم ہند کے بعد پہلے پشاور اور پھر لاہور میں سکونت اختیار کر لی۔وہ پشاور ریڈیو سے بھی منسلک رہے ۔

(جاری ہے)

لاہور میں ان کی پہلی پنجابی فلم نتھ تھی ۔مرحوم نے 40برس سے زائد فلم انڈسٹری میں میں اپنی اداکاری کے جوہر دکھائے ۔ان کی یاد گار فلموں میں فرنگی، شہید، نیند، زرق، عجب خاں، لاکھوں میں ایک، بہاریں پھر بھی آئیں گی،کٹہرا، تیرے عشق نچایا، امرا جان ادا، جبرو سمیت بے شمار شامل ہیں جبکہ انہوں نے مجموعی طور پر 400سے زائد فلموں میں اداکاری کے جوہر دکھائے ۔

وہ زندگی کے آخری ایام میں سانس کی تکلیف اور جگر کے عارضہ میں مبتلا ہونے کے باعث 19فروری 1998ء کو لاہور میں اپنے خالق حقیقی سے جا ملے ۔ فلمی صنعت سے وابستہ افراد نے مرحوم کی برسی پرانہیں خراج عقیدت پیش کیا ہے۔