نیب نے پی ٹی آئی کی رہنما فردوس عاشق اعوان کے اثاثہ جات کی چھان بین شروع کر دی

جمعہ 15 فروری 2019 18:45

لاہور (اُردو پوائنٹ اخبارتازہ ترین - این این آئی۔ 15 فروری2019ء) قومی احتساب بیورو (نیب) نے پی ٹی آئی کی رہنما فردوس عاشق اعوان کے اثاثہ جات کی چھان بین شروع کر دی ہے۔نجی ٹی وی کے مطابق قومی احتساب بیورو (نیب) نے پی ٹی آئی کی رہنما فردوس عاشق اعوان کی جائیدادوں کا ریکارڈ ایل ڈی اے سے طلب کر لیا ہے۔ دوسری جانب پی ٹی آئی رہنما کا شناختی کارڈ نمبر بھی ایل ڈی اے کو دیا گیا ہے تا کہ ان کے نام سے متعلق چھان بین کی جا سکے۔

(جاری ہے)

ایڈیشنل ڈائریکٹر نیب نے فردوس عاشق اعوان کے اثاثوں کا ریکارڈ حاصل کرنے کیلئے ایل ڈی اے حکام کو مراسلہ لکھ دیا ہے جس میں کہا گیا کہ لاہور ڈویلپمنٹ اتھارٹی کی حدود میں ان کی جتنی بھی جائیدادیں ہیں ان کا تمام تر ریکارڈ فراہم کیا جائے۔نیب کی جانب سے ایل ڈی اے کو انتباہ کیا گیا کہ 20 فروری تک فردوس عاشق اعوان کا تمام ریکارڈ اکھٹا کر کے ادارے کو فراہم کیا جائے۔ اس سلسلے میں ذرائع کی جانب سے دعویٰ کیا گیا ہے کہ لاہور نیب آمدن سے زائد اثاثہ جات کیس میں فردوس عاشق اعوان کیخلاف تحقیقات کر رہی ہے۔