سعودی ولی عہد آئندہ ہفتے چین کا دورہ کریں گے

بیجنگ(اُردو پوائنٹ اخبارتازہ ترین - آن لائن۔ 15 فروری2019ء) چین کی وزارت خارجہ نے کہا ہے کہ سعودی ولی عہد محمد بن سلمان آئندہ ہفتے چین کا دورہ کریں گے۔ واضح رہے کہ یہ دورہ ایشیا کے دورے کے حصے کا تسلسل ہوگا، جہاں سعودی شہزادے کی جانب سے پاکستان کے ساتھ سرمایہ کاری پیکج پر دستخط کا امکان ہے۔ چینی وزارت خارجہ کے مطابق سعودی عرب کے ولی عہد جمعرات اور جمعے (21 اور 22 فروری) کو دورہ کریں گے او ر چینی صدر شی جن پنگ اور نائب پریمیئر ہین ڑینگ سے ملاقات کریں گے۔

وزارت خارجہ کے ترجمان جینگ شوانگ نے پریس بریفنگ کے دوران بتایا کہ یہ دورہ 'چین-سعودی عرب تعلقات کی ترقی کو فروغ دینی' اور چین کے 'بیلٹ اینڈ روڈ' اقتصادی اور تجارتی سفارتکاری کے انیشی ایٹو کو 'مزید تقویت' دے گا۔

(جاری ہے)

واضح رہے کہ یہ دورہ دنیا کے بڑے خام تیل کے برآمد کنددہ کی جانب سے اپنے تیل کے طویل مدتی خریداروں کو یقینی بنانے کے لیے دنیا بھر میں ریفائنری اور پیٹروکیمیکلز منصوبوں میں بھاری سرمایہ کاری کے طور پر دیکھا جارہا۔

سعودی ولی عہد ایشیا کے دورے کے دوران پاکستان، بھارت، ملائیشیا اور انڈونیشنا بھی جائیں گے۔ محمد بن سلمان آج ہفتہ کو اسلام آباد کا دورہ کررہے ہیں، جہاں دونوں ممالک کے درمیان مختلف معاہدوں کا امکان ہے، جس میں گوادر میں 10 ارب ڈالر کی آئل ریفائنری کا معاہدہ بھی شامل ہے۔ یاد رہے کہ گوادر اربوں ڈالر کے پاک چین اقتصادی راہداری منصوبے کے لیے ایک خاص اہمیت رکھتا ہے اور انفرااسٹرکچر منصوبوں کی کلیکشن کو بیلٹ اینڈ روڈ انیشی ایٹو میں اہم مقصد کے طور پر دیکھا جارہا ہے۔ چین کی طرف سے شروع کی گئے اس انیشی ایٹو میں کئی ملکوں میں شروع کیے گئے 60 ارب ڈالر کے منصوبے شامل ہیں۔