سینئر اداکار آغا طالش کی برسی 19 فروری کو منائی جائیگی

ہفتہ 16 فروری 2019 16:01

لاہور (اُردو پوائنٹ اخبارتازہ ترین - این این آئی۔ 16 فروری2019ء) پاکستان فلم انڈسٹری کے سینئر اداکار آغا طالش کی21ویں برسی 19 فروری کو منائی جائیگی۔ آغا طالش 1927 ء کولدھیانہ میں پیدا ہوئے۔ ان کا اصل نام آغا علی عباس قز لباش اوران کا آبائی وطن مشرقی پنجاب بھارت کا شہر لدھیانہ تھا۔ تقسیم ہند سے قبل ہی انہیں فلموں میں کام کرنے کا شوق ممبئی لے گیا۔

ان کی پہلی فلم سرائے کے باہرتھی جس کے مصنف کرشن چند تھے۔آغا طالش نے تقسیم ہند کے بعد پہلے پشاور اور پھر لاہور میں سکونت اختیار کر لی۔

(جاری ہے)

وہ پشاور ریڈیو سے بھی منسلک رہے۔لاہور میں ان کی پہلی پنجابی فلم نتھ تھی۔مرحوم نے 40برس سے زائد فلم انڈسٹری میں میں اپنی اداکاری کے جوہر دکھائے۔ان کی یاد گار فلموں میں فرنگی، شہید، نیند، زرق، عجب خاں، لاکھوں میں ایک، بہاریں پھر بھی آئیں گی،کٹہرا، تیرے عشق نچایا، امرا جان ادا، جبرو سمیت بے شمار شامل ہیں جبکہ انہوں نے مجموعی طور پر 400سے زائد فلموں میں اداکاری کے جوہر دکھائے۔وہ زندگی کے آخری ایام میں سانس کی تکلیف اور جگر کے عارضہ میں مبتلا ہونے کے باعث 19فروری 1998ء کو لاہور میں اپنے خالق حقیقی سے جا ملے۔