میاں اسلم اقبال سے آل پاکستان کاٹن پاور لومز ایسوسی ایشن کے وفدکی ملاقات

لاہور (اُردو پوائنٹ اخبارتازہ ترین - این این آئی۔ 18 فروری2019ء) صوبائی وزیر صنعت وتجارت میاں اسلم اقبال سے سول سیکرٹریٹ میں آل پاکستان کاٹن پاور لومز ایسوسی ایشن کے وفد نے چیئرمین خالد محمود کی قیادت میں ملاقات کی اور پاور لومز انڈسٹری کو درپیش مسائل پر بات چیت ہوئی۔سیکرٹری صنعت ندیم الرحمن ،چیئرمین فیڈمک اور متعلقہ حکام بھی اس موقع پرموجو دتھے۔

صوبائی وزیر صنعت وتجارت میاں اسلم اقبال نے وفد سے گفتگو کرتے ہوئے کہا کہ پنجاب حکومت نے چھوٹی اور درمیانی صنعتوںکو فروغ دینے کے لئے انقلاب آفریں سکیمیں بنائی ہیں جن کا اجراء آئندہ ماہ کیا جائے گا۔انہوں نے کہا کہ پاور لومز انڈسٹری کو بھی بحال کیا جائے گا۔اس مقصد کے لئے فیصل آباد میں دو سو ایکڑ رقبے پر ویونگ سٹی بنایا جائے گا جہاں پاور لومز کو منتقل کیا جائے گا۔

(جاری ہے)

پہلے مرحلے میں سوایکڑ رقبے پر جبکہ دوسرے مرحلے پر بھی سو ایکڑ رقبے پر ویونگ سٹی میں پاور لومز کو منتقل کریں گے۔صوبائی وزیر نے کہا کہ پاور لومز کو اپ گریڈ کرنے کے لئے حکومت بھرپور تعاون کرے گی۔کیونکہ اس صنعت سے ہزاروںلوگوں کاروزگار وابستہ ہے۔انہوںنے کہا کہ ویونگ سٹی میں اگر کسی نے پلاٹ لے کر فروخت کیا تو حکومت ایسا ہرگز نہیں ہونے دے گی۔

ویونگ سٹی میں ہر پلاٹ پر پاور لومز ہی لگیں گی۔اگر یہاں خریدے گئے پلاٹ پاور لومز نہ لگیں تو پلاٹ کی فروخت کینسل کر دی جائے گی۔صوبائی وزیر نے کہا کہ لومز میں نئی ٹیکنالوجی کوفروغ دیا جائے تاکہ اس کی پیداواری صلاحیت میں اضافہ ہو۔چیئرمین آل پاکستان کاٹن پاور لومز ایسوسی ایشن خالد محمود نے کہا کہ پی ٹی آئی کی حکومت نے صنعتوں کے فروغ کے لئے جو تاریخ ساز اقتصادی پیکج دیا ہے اس سے پاور لومز انڈسٹری کو بھی ریلیف ملا ہے۔حکومت کے اس انقلابی فیصلے سے ملک کی برآمدات بڑھیں گی۔سابق چیئرمین آل پاکستان کاٹن پاور لومز ایسوسی ایشن عبدالحق اور سابق صدر فیصل آباد چیمبر آف کامرس اینڈ انڈسٹری چوہدری محمد نواز اور دیگر وفد میں شامل تھے۔