پی آئی اے نے ملتان سے شارجہ کے لئے ہفتہ وار دو پروازوں کا آغاز کر دیا

بدھ 20 فروری 2019 19:17

کراچی (اُردو پوائنٹ اخبارتازہ ترین - این این آئی۔ 20 فروری2019ء) پی آئی اے نے ملتان سے شارجہ کے لئے ہفتہ وار دو پروازوں کا آغاز کر دیا۔ اس سلسلے میں افتتاحی پرواز بدھ کو علی الصبح روانہ ہوگئی۔ وزیر خارجہ شاہ محمود قریشی افتتاحی تقریب کے مہمان خصوصی تھے جبکہ وزیر ہوابازی محمد میاں سومرو مہمان اعزاز تھے۔ پی آئی اے کے صدر و چیف ایگزیکٹو آفیسر ائر مارشل ارشد ملک بھی اس موقع پر موجود تھے۔

پہلی پرواز پی کے 293 کے ذریعے 166 مسافر صبح 35۔1 بجے روانہ ہوئے۔شاہ محمود قریشی نے اپنے خطاب میں کہا کہ پی ٹی آئی کی حکومت پی آئی اے کو ایک منافع بخش ادارہ بنانے کے لئے ہر ممکن اقدامات کرے گی۔ مجھے امید ہے کہ سی ای او ائیر مارشل ارشد ملک کی کوششیں کامیاب ہوں گی اور پی آئی اے میں ترقی کا سفر جاری رہے گا۔

(جاری ہے)

وزیر ہوا بازی محمد میاں سومرو نے کہا کہ وہ ائیر مارشل ارشد ملک اور انکی انتظامیہ کی کارکردگی اور کاوشوں سے مطمئن ہیں۔

ائیر مارشل ارشد ملک نے کہا کہ پی آئی اے میں ترقی کا سفر جاری ہے۔ شارجہ کے لئے پروازوں کا آغاز جنوبی پنجاب کے عوام کے لئے تحفہ ہے جس سے انکی عرب امارات تک رسائی براہ راست ہو جائے گی۔ائیر مارشل ارشد ملک نے کہا کہ گزشتہ 4 ماہ کے دوران یہ ہماری چھٹی نئی پرواز ہے جبکہ 21 فروری کو پشاور سے شارجہ اور 22 فروری کو پشاور سے العین کے لئے پروازوں شروع کی جا رہی ہیں جو خیبر پختون خوا کے عوام کے لئے پی آئی اے کا تحفہ ہو گا۔