نجم سیٹھی نے والد کے انتقال پر غلط رمیز راجہ سے تعزیت کرڈالی

رمیز راجہ جونیئر کے والد کا انتقال پر نجم سیٹھی نے رمیز راجہ سے تعزیت کی

Zeeshan Mehtab ذیشان مہتاب جمعہ 22 فروری 2019 13:38

نجم سیٹھی نے والد کے انتقال پر غلط رمیز راجہ سے تعزیت کرڈالی
لاہور (اردو پوائنٹ تازہ ترین اخبار۔22فروری 2019ء) سابق چیئرمین پی سی بی نجم سیٹھی رمیز راجہ جونیئر کے والد کے انتقال پر قومی ٹیم کے سابق کپتان اور معروف کمنٹیٹر رمیز راجہ سے تعزیت کر بیٹھے۔تفصیلات کے مطابق رمیز راجہ جونیئر کے والد رضائے الٰہی سے انتقال کرگئے تو انہوں نے سماجی رابطے کی ویب سائٹ ٹویٹر پر مداحوں سے دعائے مغفرت کی درخواست کی۔

(جاری ہے)

سابق چیئرمین پی سی بی نجم سیٹھی نے اپنی ٹویٹ میں سابق ٹیسٹ کرکٹر اور موجودہ کمنٹیٹر راجہ کو مخاطب کرتے ہوئے کہا کہ آپ کے والد کی وفات کا سن کر بہت افسوس ہوا، اللہ تعالیٰ ان کی مغفرت فرمائے۔نجم سیٹھی نے لکھا کہ آپ کی کامیابیوں پر والد بڑا فخر محسوس کرتے ہوں گے، آپ کے اہل خانہ کے لیے دعا گو ہوں۔ٹویٹر صارفین نے فوری طور پر ان کی غلطی پر احساس دلایا کہ رمیز راجہ جونیئر کے والد کا انتقال ہوا ہے، ایک صارف نے لکھا کہ مان لو نجم سیٹھی صاحب آپ بوڑھے ہوگئے ہیں۔

رمیز راجہ جونیئر کے والد کے انتقال پر قومی کرکٹ ٹیم کے کپتان سرفراز احمد، فواد عالم، سہیل تنویر سمیت دیگر کھلاڑیوں نے تعزیت کا اظہار کیا اور دعائے مغفرت کی۔