ٹیکس دہندگان میں کراچی والے سرفہرست، ایف بی آر فہرست جاری

کراچی کی صائمہ شہباز ملک نے 2018 میں سب سے زیادہ ٹیکس جمع کرانے کا ریکارڈ قائم کردیا

ہفتہ 23 فروری 2019 14:23

ٹیکس دہندگان میں کراچی والے سرفہرست، ایف بی آر فہرست جاری
کراچی (اُردو پوائنٹ اخبارتازہ ترین - این این آئی۔ 23 فروری2019ء) فیڈرل بورڈ آف ریونیو(ایف بی آر)نے 150 ایسے افراد کی فہرست جاری کی ہے جنہوں نے سرکاری خزانے میں سب سے زیادہ ٹیکس جمع کرایا ہے۔ ان میں سے کراچی کی صائمہ شہباز ملک نے 2018 میں سب سے زیادہ ٹیکس جمع کرانے کا ریکارڈ قائم کیا۔ مجموعی فہرست میں سے مہوش ٹپال بھی خاتون ہیں جن کا تعلق کراچی سے ہے اور وہ سب سے زیادہ ٹیکس جمع کرانے والوں کی فہرست میں 45ویں نمبر پر ہیں۔

(جاری ہے)

ذرائع کے مطابق، ایف بی آر کی جانب سب سے زیادہ ٹیکس جمع کرانے والے 50 افراد (ٹاپ ففٹی)بھی جاری کی گئی ہے جسے تین حصوں میں تقسیم کیا گیا ہے۔ ان میں انفرادی طور پر ٹیکس جمع کرانے والے افراد، لوگوں کی ایسوسی ایشن (اے او پی)اور کمپنیاں شامل ہیں۔ یہ فہرستیں ایک دو روز میں جاری کر دی جائیں گی۔ ٹاپ ففٹی کی فہرست میں سب سے زیادہ ٹیکس شہریوں کی جانب سے انفرادی حیثیت میں جمع کرایا گیا ہے اور 50 میں سے 33 افراد ایسے ہیں جنہوں نے 2018 میں سب سے زیادہ ٹیکس جمع کرایا۔ اس کے بعد لاہور کے 6 افراد، گوجرانوالہ کے تین، اسلام آباد سے دو جبکہ سکھر، ایبٹ آباد، حیدرآباد، کوئٹہ اور ملتان کے ایک ایک شہری نے ٹیکس جمع کرا کے اپنا نام ٹاپ ففٹی میں شامل کرایا ہے۔