بھارت جنگی جنون میں مبتلا ہے ، ہم یہاں امن کے فروغ کیلئے کرکٹ کا جنون دکھا رہے ہیں، سعید غنی

کراچی افتخار شلوانی کاامن و امان کی بحالی پر اگلا پی ایس ایل سیزن پاکستان میں منعقد کرنے کی خواہش کا اظہار

جمعہ 1 مارچ 2019 16:14

بھارت جنگی جنون میں مبتلا ہے ، ہم یہاں امن کے فروغ کیلئے کرکٹ کا جنون ..

کراچی (اُردو پوائنٹ اخبارتازہ ترین - این این آئی۔ 01 مارچ2019ء) وزیر بلدیات سندھ سعید غنی نے کہا ہے کہ بھارت جنگی جنون میں مبتلا ہے ، ہم یہاں امن کے فروغ کیلئے کرکٹ کا جنون دکھا رہے ہیں۔پی ایس ایل کی رنگارنگ افتتاحی تقریب کا انعقاد ایف ٹی سی کے بمقابل گرین بیلٹ پر ہواجس میں کرکٹ سے محبت کرنے والے شہریوں کا جوش و خروش قابل دید تھا۔

(جاری ہے)

پاکستان کے قومی و ثقافتی رنگوں سے سجی اس تقریب میں آتش بازی کا شاندار مظاہرہ بھی کیا گیا اس موقع پر سعید غنی نے کہاکہ صوبائی حکومت کی جانب سے تمام اداروں کو پی ایس ایل کا جشن منانے کیلئے اجازت دی گئی ہے اور اس سلسلے میں حکومت بھی ان کے ساتھ تعاون کریگی۔

سعید غنی نے کہا کہ کراچی میں پی ایس ایل کو بھرپور طریقے سے خوش آمدید کہنے کے لیے شہر کو سجانے کی مہم کا آغاز کردیا گیا ، انہوں نے امید ظاہر کی کہ شہری پی ایس ایل سے خوب لطف اندوز ہوں گے۔اس موقع پر کمشنر کراچی افتخار شلوانی نے شہر میں امن و امان کی بحالی پر اگلا پی ایس ایل سیزن پاکستان میں منعقد کرنے کی خواہش کا اظہار کیا۔انہوں نے کہا کہ پورے شہر میں پی ایس ایل کے سائن بورڈز آویزاں کردئیے گئے ہیں، اور اب کراچی کے ہر حصے میں پی ایس ایل کا جشن ہوگا۔