انٹرنیشنل کرکٹ میں کھلاڑیوں کو آرام کا موقع ضرور ملنا چاہیے:وقاریونس

لاہور(اردو پوائنٹ تازہ ترین اخبار۔7مارچ 2019ء) قومی ٹیم کے سابق کوچ وقار یونس کا کہنا ہے مسلسل کرکٹ کھیلنے سے مسائل تو سامنے آئیں گے، انٹرنیشنل کرکٹ میں کھلاڑیوں کو آرام کا موقع ضرور ملنا چاہیے۔ابوظہبی میں کوئٹہ گلیڈی ایٹرز کے ہاتھوں دفاعی چیمپئن اسلام آباد یونائیٹڈ کی شکست کے بعد فرنچائز کے ڈائریکٹر وقاریونس سے سوال کیا گیا کہ مسلسل انٹرنیشنل کرکٹ کھیلنے کے بعد آپ کی ٹیم میں شامل قومی کھلاڑی شاداب خان، فہیم اشرف، حسین طلعت اور آصف علی تھکاوٹ کا شکار نظر آ رہے ہیں اور یہ کھلاڑی ورلڈ کپ پلان کا بھی حصہ ہیں۔

سابق کپتان نے کہا کہ ان کے خیال میں سلیکٹرز پی ایس ایل کی بنیاد پر ٹیم منتخب نیںکریں گے اور ورلڈ کپ کے لئے 18 سے 20 کھلاڑی پہلے ہی ان کے ذہن میں ہوں گے، پی ایس ایل کی فرنچائزز کے مالکان بھاری سرمایہ کاری کرتے اور توقع رکھتے ہیں کہ کھلاڑی اچھی کارکردگی کا مظاہرہ کریں لیکن کبھی کبھی محسوس ہوتا ہے کہ کھلاڑی تھکاوٹ کا شکار ہیں، شاہین شاہ آفریدی کے فٹنس کے مسائل سامنے آئے، جب کھلاڑی مسلسل کرکٹ کھیلیں گے تو ایسی چیزیں دیکھنے کو ملیں گی، انٹرنیشنل کرکٹ میں کھلاڑیوں کو آرام کا موقع ضرور ملنا چاہیے۔

(جاری ہے)

پی ایس ایل میں زیادہ تر باﺅلنگ ٹیلنٹ ہی سامنے آنے کے سوال پر لیجنڈری کرکٹر کا کہنا تھا کہ ایسا 30 سال سے ہو رہا ہے، پاکستان کو فاسٹ باﺅلرز ملتے رہے ہیں اور ملتے رہیں گے، یہ خوش آئند بات ہے کہ حارث رﺅف، محمد موسی، حسنین اور الیاس جیسے پیسر متاثر کن کارکردگی پیش کر رہے ہیں، یہاں سامنے آنے والے ایک، دو باﺅلرز کو ٹی ٹونٹی ورلڈ کپ کے لئے تیار کرسکتے ہیں۔