آئی سی سی کے چیف ایگزیکٹیو ڈیو رچرڈسن فائنل دیکھنے کیلئے 16 مارچ کو کراچی آئیں گے

نظم الحسن نیشنل اسٹیڈیم میں پاکستان سپر لیگ کا فائنل دیکھیں گے اور 18 مارچ کو وطن واپس روانہ ہوں گے، حکام پی سی بی

جمعہ 8 مارچ 2019 15:48

اسلام آباد (اُردو پوائنٹ اخبارتازہ ترین - این این آئی۔ 08 مارچ2019ء) آئی سی سی کے چیف ایگزیکٹیو ڈیو رچرڈسن فائنل دیکھنے کیلئے 16 مارچ کو کراچی آئیں گے۔ میڈیا رپورٹ کے مطابق آئی سی سی کے چیف ایگزیکٹیو ڈیو رچرڈسن فائنل دیکھنے کیلئے 16 مارچ کو کراچی آئیں گے۔دوسری جانب کرکٹ آسٹریلیا کے سیکیورٹی کے سربراہ شان کیرل نے بھی پاکستان آنے کی تصدیق کردی ہے۔

بنگلہ دیش کرکٹ بورڈ کے سربراہ اور ایشین کرکٹ کونسل کے صدر نظم الحسن پاکستان کرکٹ بورڈ کی خصوصی دعوت پر اتوار کو ملائیشیا سے کراچی پہنچیں گے وہ پاکستان میں دس دن قیام کریں گے۔پی سی بی کے ترجمان کا کہنا ہے کہ نظم الحسن نیشنل اسٹیڈیم میں پاکستان سپر لیگ کا فائنل دیکھیں گے اور 18 مارچ کو وطن واپس روانہ ہوں گے۔

(جاری ہے)

پی سی بی کے مطابق آئندہ سال بنگلہ دیش کرکٹ ٹیم نے پاکستان کا دورہ کرنا ہے اس لیے نظم الحسن کو پاکستان مدعو کیا گیا ہے۔

ترجمان پی سی بی کے مطابق صدر پاکستان ڈاکٹر عارف علوی کو فائنل کے لیے مدعو کیا جارہا ہے جب کہ چاروں وزرائے اعلیٰ کو بھی میچز دیکھنے کے لیے مدعو کیا گیا تھا، پنجاب کے وزیراعلیٰ عثمان بزدار نے 11 مارچ کے میچ میں شرکت کی تصدیق کی ہے۔ پی سی بی اور پی ایس ایل کے سابق سربراہ نجم سیٹھی کو کراچی میں ہونے والے تمام میچز کی دعوت احسان مانی نے خود دی ہے۔