لاہور، سعد رفیق اور سلمان رفیق کے اکائونٹس میں کروڑوں منتقل کرنیوالی کمپنی ایگزیکٹو بلڈرز کے اکائونٹ کھولنے کی درخواست پر نیب سے 19 مارچ تک دوبارہ جواب طلب

ہفتہ 16 مارچ 2019 22:18

لاہور (اُردو پوائنٹ اخبارتازہ ترین - آن لائن۔ 16 مارچ2019ء) احتساب عدالت نے لیگی رہنمائوں خواجہ سعد رفیق اور سلمان رفیق کے اکائونٹس میں کروڑوں روپے منتقل کرنے والی کمپنی ایگزیکٹو بلڈرز کے اکائونٹ کھولنے کی درخواست پر نیب سے 19 مارچ تک دوبارہ جواب طلب کر لیا۔ ہفتے کو احتساب عدالت کے ڈیوٹی جج جوادالحسن کے رووبرو پیراگون ہاوسنگ سوسائٹی سے متعلقہ کمپنی ایگزیکٹو بلڈرز کی نیب کی جانب سے منجمد کئے گئے تین بنک اکاونٹس کھولنے کی درخواست پر سماعت ہوئی۔

(جاری ہے)

عدالت نے نیب سے دوبارہ جواب طلب کرتے ہوئے سماعت 19 مارچ تک ملتوی کر دی۔ احتساب عدالت میں ایگزیکٹیو بلڈرز کے مینجر آپریشنز عثمان نے بشارت اسحاق ایڈووکیٹ کی وساطت سے درخواست دائر کی گئی ہے۔ نیب کی جانب سے ایگزیکٹیو بلڈرز نامی کمپنی پر پیراگون ہاوسنگ سوسائٹی کیس کے ملزمان خواجہ سعد رفیق اور خواجہ سلمان رفیق کے اکاونٹ میں کروڑوں روپے منتقل کا الزام ہے۔ درخواست میں موقف اختیار کیا گیا ہے کہ نیب نے پیراگون ہائوسنگ سوسائٹی کیس میں ہمارے بھی تین بنک اکاونٹ منجمند کر دئیے ہیں جس کی وجہ سے کمپنی شدید مالی مشکلات کا شکار ہے اس لئے استدعا ہے کہ ضروری اخراجات کے لئے بنک اکاؤنٹ کھولے جائیں۔