اداکارہ زارا شیخ کی طویل عرصے بعد فلموں میں واپسی

فلم’’ہیرمان جا‘‘ عید الضحیٰ کے موقع پر ریلیز کی جائے گی‘اداکارہ گانے پر پرفارم کریں گی

اتوار 17 مارچ 2019 11:40

کراچی(اُردو پوائنٹ اخبارتازہ ترین - این این آئی۔ 17 مارچ2019ء) پاکستان فلم انڈسٹری کی نامور اداکارہ زارا شیخ طویل عرصے بعد ایک بار پھر فلموں میں نظر آئیں گی۔2000 میں فلم ’’تیرے پیار میں‘‘کے ذریعے فلموں میں قدم رکھنے والی خوبرو اداکارہ زارا شیخ اپنی پہلی ہی فلم سے شائقین کے دلوں میں اترنے میں کامیاب ہوگئی تھیں۔ بعد ازاں زارا شیخ فلم’’چلو عشق لڑائیں‘‘ اور ’’لاج‘‘سمیت متعدد فلموں میں نظر آئیں تاہم طویل عرصے سے زارا شیخ اسکرین سے غائب ہیں اور اب ان کے مداحوں کے لیے اچھی خبر ہے کہ زارا شیخ فلموں میں واپسی کررہی ہیں۔

اداکارہ زارا شیخ عید الضحیٰ پر ریلیز ہونے والی فلم’’ہیر مان جا‘‘ میں ایک گانے پر پرفارم کرتی نظر آئیں گی جب کہ یہ بھی کہاجارہا ہے کہ زارا شیخ فلم میں مختصر کردار بھی ادا کریں گی تاہم اس حوالے سے حتمی خبر سامنے نہیں آئی ہے۔

(جاری ہے)

واضح رہے کہ زارا شیخ گزشتہ برس فلم’’جیک پوٹ‘‘میں نہایت مختصر کردار میں نظرآئی تھیں لیکن کردار اتنا مختصر تھا کہ کسی نے بھی انہیں فلم میں نوٹس نہیں کیا تاہم فلم’’ہیرمان جا‘‘کو ان کی واپسی قرار دیا جارہا ہے۔

واضح رہے کہ فلم’’ہیرمان جا‘‘میں پاکستان شوبز کی خوبصورت جوڑی حریم فاروق اورعلی رحمان مرکزی کرداروں میں نظر آئیں گے، اس سے قبل دونوں فلم’’پرچی‘‘اور مختلف ڈراموں میں بھی ایک ساتھ اداکاری کے جوہر دکھا چکے ہیں۔ فلم عید الضحیٰ کے موقع پر ریلیز کی جائے گی۔