آفتاب صدیقی کی سی ای او کلفٹن کنٹونمنٹ بورڈ سے ملاقات، مسائل کے فوری حل کا مطالبہ

پیر 18 مارچ 2019 18:19

کراچی (اُردو پوائنٹ اخبارتازہ ترین - این این آئی۔ 18 مارچ2019ء) ایم این اے آفتاب صدیقی کی قیادت میں پی ٹی آئی وفد کی سی ای او سی بی سی رانا کاشف سے ملاقات، حلقے کے مسائل سے آگاہ کیا، جلد حل کرنے کا مطالبہ۔ تفصیلات کے مطابق تحریک انصاف کے سینئر رہنما اور ایم این اے آفتاب صدیقی نے وفد کے ہمراہ کلفٹن کنٹونمنٹ بورڈ کے چیف ایگزیٹو آفیسر رانا کاشف سے ان کے دفتر میں ملاقات کی۔

وفد میں ایم پی اے ادیبہ ، نائلہ علوی اور دیگر شامل تھے۔

(جاری ہے)

آفتاب صدیقی نے کلفٹن کے رہائشیوں کو درپیش پانی کے بحران، پمپنگ اسٹیشن، سیوریج لائنز کی ناقص صورتحال، کچروں کے ڈھیر ، اسٹریٹ لائٹس ، گزری پل کے اطراف قائم تجاوزات سمیت دیگر مسائل اجاگر کیے اور ان کو ہنگامی بنیادوں پر حل کرنے کا مطالبہ کیا۔انہوں نے آر او پلانٹس لگانے کے اجازت نامے کی بھی درخواست کی تاکہ ووٹر زاور عوام کو اپنی مدد آپ کے تحت پانی کی فراہمی ممکن بنائی جاسکے۔ سی ای او کلفٹن کنٹونمنٹ بورڈ رانا کاشف نے تمام ایشوز کے فوری حل کے لیے اقدامات کرنے کی یقین دہانی کرائی۔