وزیرخارجہ نے قومی امور پر پارلیمانی جماعتوں کی مشاورتی کانفرنس طلب کرل

اسلام آباد(اُردو پوائنٹ اخبارتازہ ترین - آن لائن۔ 18 مارچ2019ء) وزیرخارجہ شاہ محمود قریشی نے اہم قومی امور اور نیشنل ایکشن پلان پر مشاورت کے لیے پارلیمانی جماعتوں کی مشاورتی کانفرنس طلب کرلی۔ وزیرخارجہ شاہ محمود قریشی کی جانب سے پارلیمانی جماعتوں کے قائدین کو خطوط لکھے گئے ہیں جس میں 28 مارچ شام 4 بجے پارلیمنٹ ہاؤس میں مشاورتی کانفرنس میں شرکت کی دعوت دی گئی ہے۔

شاہ محمود قریشی نے خط میں کہا ہیکہ دسمبر 2014 میں آرمی پبلک اسکول پشاور کے المناک واقعے کے بعد نیشنل ایکشن پلان مرتب ہوا تھا، یہ پلان تمام سیاسی جماعتوں کی مشاورت کے نتیجے میں قومی اتفاق رائے کا مظہر تھا، دہشت گردی کے عفریت کے خاتمے کے لیے نیشنل ایکشن پلان کے مختلف پہلو ہیں، کسی دوسرے ملک کے خلاف اپنی سرزمین استعمال نہ ہونے دینے کے عوامی وعدے کی پاسداری بھی قومی ایکشن پلان میں شامل ہے۔

(جاری ہے)

خط میں مزید کہا گیا ہیکہ اقوام متحدہ کی پابندیوں سے متعلق ذمہ داریوں پر عملدرآمد اور انسداد دہشتگردی کی مالی معاونت سے متعلق عالمی تقاضوں پر عملدرآمد بھی قومی حکمت عملی کا اہم حصہ ہے۔ وزیر خارجہ نے کہا ہیکہ دہشتگردی کے خلاف ہماری جہد مسلسل کے اعادیکیلئے تمام سیاسی جماعتوں کو کانفرنس میں شرکت کی دعوت دیتا ہوں، یہ مشاورت پاکستان کی قومی حکمت عملی پر تیزی سے عملدرآمد کیلئے ہمارے عزم کے تسلسل اور اس کی اہمیت کو دنیا میں اجاگر کرے گی، نیشنل ایکشن پلان پر عملدرآمد واضح طور پر پاکستان کے عوام کے طویل المدتی مفاد میں ہے۔ #h#