کامیڈی فلم’ ’رانگ نمبر ٹو‘‘ کا پہلا پوسٹر جاری کردیاگیا

فلم میں اس بار دانش تیمور کی جگہ سمیع خان اور سوہائے علی ابڑو کی جگہ نیلم منیر مرکزی کردار ادا کریں گے فلم ’’رانگ نمبر ٹو‘‘ رواں سال عید الفطر پر سنیما گھروں کی زینت بنے گی

بدھ 20 مارچ 2019 11:05

کامیڈی فلم’ ’رانگ نمبر ٹو‘‘ کا پہلا پوسٹر جاری کردیاگیا
کراچی(اُردو پوائنٹ اخبارتازہ ترین - این این آئی۔ 20 مارچ2019ء) رومانس اور کامیڈی سے بھرپور فلم ’رانگ نمبر‘ کی مقبولیت کے بعد فلم ’رانگ نمبر ٹو‘ کا پہلا پوسٹر جاری کردیا گیا۔سال 2015ء میں پاکستان فلم انڈسٹری میں کامیڈی فلموں کو مزید پروان چڑھانے کے لیے مزاح سے بھرپور فلم ’رانگ نمبر‘ ریلیز کی گئی تھی جسے شائقین کی جانب سے خوب پذیرائی ملی اور فلم بھی بہترین کہانی کی وجہ سے باکس آفس پر 30 کروڑ سے زائد مالیت کا بزنس کرنے میں کامیاب رہی تھی۔

یاسر نواز کی ہدایت کاری میں بننے والی طنز و مزاح سے بھرپور اس فلم کے سیکوئل کا شائقین کو بے صبری سے انتظار تھا جس کے بعد سے فلم میکرز کی جانب سے فلم کا پہلا سیکوئل بنانے کی تیاریاں شروع کردی گئی تھیں اور اب پہلا پوسٹر جاری کردیا گیا ہے۔

(جاری ہے)

فلم ’رانگ نمبر ٹو‘ میں اس بار دانش تیمور کی جگہ سمیع خان اور سوہائے علی ابڑو کی جگہ نیلم منیر مرکزی کردار ادا کریں گے، فلم کو اپنے چٹکلوں سے مزاح بخشنے والے محمود اسلم اور جاوید شیخ اس بار بھی فلم میں اداکاری کے جوہر دکھائیں گے۔

اس سیکوئل کی خاص بات یہ ہے کہ یاسر نواز پروڈکشن کے ساتھ ساتھ فلم میں بھی مزاح بکھیرتے نظر آئیں گے جن کے ساتھ اٴْن ہی کے بھائی دانش نواز اداکارہ ثناء کے ساتھ نظر آئیں گے۔وائے این ایچ کے بینر تلے بننے والی یہ فلم رانگ نمبر ٹو‘ یاسر نواز اور حسن ضیاء کی مشترکہ پروڈکشن میں بنائی جا رہی ہے جس کی کہانی خود یاسر نواز نے تحریر کی ہے جوکہ رواں سال عید الفطر پر ہی سنیما گھروں کی زینت بنے گی۔

متعلقہ عنوان :