سی پیک کیلئے مختص فنڈز پی ٹی آئی کے ارکان اسمبلی میں تقسیم کئے جارہے ہیں،لیگی رہنمائوں کی عدالت عالیہ میں رِٹ پٹیشن دائر

ہفتہ 23 مارچ 2019 21:56

ہارون آباد (اُردو پوائنٹ اخبارتازہ ترین - آن لائن۔ 23 مارچ2019ء) ہارون آباد قومی اسمبلی میں متحدہ اپوزیشن سے تعلق رکھنے والے ن لیگ کے رانا ثناء اللہ سابق وزیر قانون ، خواجہ آصف ، ایم این اے ہارون آباد فورٹ عباس نور الحسن تنویر سمیت دس ارکان اسمبلی نے عدالت عالیہ میں رِٹ پٹیشن دائر کی ہے کہ سی پیک کے لئے مختص 24ارب روپے کے فنڈز پی ٹی آئی کے ارکان اسمبلی میں تقسیم کئے جارہے ہیں۔

(جاری ہے)

حالانکہ گزشتہ عام انتخابات سے قبل عدالت عالیہ نے پائپ میں رواں ترقیاتی فنڈز کو روک دیا گیا تھا کہ اس طرح ووٹرز کی آزادانہ رائے پر اثر انداز نہ کیا جاسکے۔ چاہئے تو یہ تھا کہ عوامی آراء پر منصوبہ جات کو آنے والے وقت میں تکمیل تک پہنچایا جاتا لیکن اب نئی حکومت نے ہمارے جاری پرانے منصوبہ جات کو پس پشت ڈال دیا ہے اس لئے اپوزیشن کے ارکان اسمبلی نے اس سلسلے میں بھرپور قانونی جدوجہد کا فیصلہ کیا ہے اور ایوان میں بھی اس سلسلہ میں موثر آواز اٹھائی جائے گی۔ تاکہ عوامی آراء اور احساسات کی بھرپور ترجمانی ہو سکے۔ یہ بات نور الحسن تنویر ایم این اے نے خصوصی گفتگو کرتے ہوئے کہا کہ رِٹ پٹیشن کو عدالت عالیہ نے سماعت کے لئے منظور کر لیا ہے۔