گوجرانوالہ: سکول میں یوم پاکستان تقریب کے دوران دیوار گر گئی

ایک خاتون سمیت 5بچے جاں بحق ،13 زخمی ہوگئے ، 2کی حالت تشویشناک د ڈپٹی کمشنر نائلہ باقر موقع پر پہنچی اور فوری طور پر تحقیقات کے آغاز کی ہدایت کی

ہفتہ 23 مارچ 2019 23:01

گوجرانوالہ(اُردو پوائنٹ اخبارتازہ ترین - آن لائن۔ 23 مارچ2019ء) گوجرانوالہ کے اسکول میں یوم پاکستان کی تقریب کے دوران دیوار گرنے سے ایک خاتون اور 5 بچے جاں بحق ہوگئے۔ریسکیو حکام کے مطابق حادثے کے وقت اسکول میں یوم پاکستان اور اسکول کی تعلیمی تقریب جاری تھی کہ دیوار گر گئی۔واقعہ کشمیر ٹاؤن میں موجود ایک نجی اسکول میں پیش آیا، جہاں پانی کی لیکیج کی وجہ سے خستہ حال ہونے والی دیوار منہدم ہوگئی، جس کے نتیجے میں 6 افراد جاں بحق جبکہ 13 زخمی ہوگئے۔

زخمی ہونے والے افراد کو طبی امداد کے لیے ڈسٹرکٹ ہسپتال منتقل کیا گیا، جہاں 2 بچوں کی حالت تشویش ناک بتائی جاتی ہے۔اس افسوسناک حادثے میں جاں بحق ہونے والی خاتون ایک بچے کی ماں تھی اور وہ اسکول میں اپنے بجے کا ریزلٹ لینے آئی تھی کہ دیوار منہدم ہوگئی اور دونوں ماں بیٹے زندگی کی بازی ہار گئے۔

(جاری ہے)

پولیس کے مطابق حادثے میں جاں بحق خاتون کی شناخت کوثر اور ان کے بیٹے کی شاہان کے نام سے ہوئی جبکہ دیگر افراد میں 16 سالہ نور، 14 سالہ فاطمہ، 11 سالہ خدیجہ، 7 سالہ محسن شامل ہیں۔

واقعے کے فوری بعد ڈپٹی کمشنر نائلہ باقر موقع پر پہنچی اور فوری طور پر تحقیقات کے آغاز کی ہدایت کی۔انہوں نے کہا کہ اسکول پرنسپل دیوار کی خستہ حالی سے باخبر تھے لیکن اس کی مرمت نہیں کروائی اور اسکول انتظامیہ کی غفلت سے یہ حادثہ پیش آیا۔ڈپٹی کمشنر کی جانب سے انتظامیہ کو وہ فوری طور پر اسکول پرنسپل کے خلاف فرسٹ انفارمیشن رپورٹ (ایف آئی آر ) درج کرنے کی ہدایت کی گئی۔پولیس نے بتایا کہ اسکول کے مارک طارق سعید مسلم لیگ (ن) کے یوسی چیئرمین ہیں تاہم ان کے بھائی کو گرفتار کرلیا گیا ہے۔علاوہ ازیں پنجاب کے وزیر تعلیم مراد راس نے واقعے کا نوٹس لیا اور گوجرانوالہ کا دورہ بھی کیا۔