رات کو دس سے صبح چھے بجے تک کی نیند نوجونانوں کو ذہنی طور پر صحت مند رکھتی ہے ،ماہرین

کراچی (اُردو پوائنٹ اخبارتازہ ترین - این این آئی۔ 25 مارچ2019ء) جناح سندھ میڈیکل یونیورسٹی میں کنٹینیوڈ میڈیکل ایجوکیشن ڈپارٹمنٹ کے زیر اہتمام سیمینار کا انعقاد کیا گیا ۔سیمینار کا مقصد طالبعلموں میں موبائل اور انٹر نیٹ کے استعمال کے حوالے سے شعور بیدار کرنا تھا ۔سیمینار سے معروف ماہر نفسیات ڈاکٹر اقبال خان آفریدی اور ایس ایم سی کے سابق طالبعلم ڈاکٹر عرفان علی سید نے خطاب کیا ۔

اس موقع پر گفتگو کرتے ہوئے ڈاکٹر اقبال آفریدی نے کہاکہ آج کی نسل کے تمام مسائل کا حل اسلامی تعلیمات کی بجاآوری میں پوشیدہ ہے ۔اسلام زندگی کے کے ہر معاملے میں میانہ روی کا درس دیتا ہے ۔یہ ہی اصول انٹرنیٹ کا استعمال کرتے ہوئے بھی اختیار کرنا چاہیئے ۔انہوں نے کہاکہ آج کل بچے رات گئے تک کمپیوٹر اور انٹرنیٹ کی دنیا میں گم رہتے ہیں جس کی وجہ سے ان میں متعدد نفسیاتی مسائل جنم لے رہے ہیں جن میں ڈپریشن سب سے عام ہے ۔

(جاری ہے)

ڈپریشن سے بچے رہنے کے لیے ضروری ہے کہ رات کو زیادہ سے زیادہ رات ساڑھے دس بجے تک سوجایا جائے اور صبح سویرے اٹھا جائے ۔رات کی پرسکون نیند اور دن میں بیس منٹ کی ورزش انسان کو بہت سی بیماریوں سے دور رکھتی ہے ۔ سیمینار سے خطاب کرتے ہوئے آئرلینڈ میں نفسیات داں کے طور پر خدمات انجام دینے والے ڈاکٹر عرفان علی سید کا کہنا تھا کہ فی زمانہ جدید ٹیکنالوجی نے ہم سب کو اپنے پنجوں میں جکڑ لیا ہے جبکہ ہونا یہ چاہیے تھا کہ ٹیکنالوجی ہماری تابع ہوتی نہ کہ ہم اس کے ۔

ڈاکٹر عرفان علی سید نے اس موقع پر گیجٹس کے استعمال کے بد اثرات کے حوالے سے پریزنٹیشن بھی دی جس میں مختلف مثالوں کے ذریعے نوجوانوں کو انٹرنیٹ کی دنیا سے بلاضرورت قرب حاصل کرنے کے نقصانات بتائے ۔سیمینار کی روح رواں ڈاکٹر راحت ناز نے آخر میں مہمانوں کا شکریہ ادا کیا ۔