کرائسٹ چرچ سانحہ میں شہید ہونے والے سید اریب احمدکوآہوں اور سسکیوں کے دوران سخی حسن قبرستان میں سپردخاک کردیا گیا

کراچی(اُردو پوائنٹ اخبارتازہ ترین - این این آئی۔ 25 مارچ2019ء) سانحہ کرائسٹ چرچ میں شہید ہونے والے پاکستانی سید اریب احمدکوآہوں اور سسکیوں کے دوران سخی حسن قبرستان میں سپردخاک کردیاگیا، اس موقع پر ہرآنکھ اشکبار تھی۔تفصیلات کے مطابق نیوزی لینڈ کے شہرکرائسٹ چرچ میں دہشتگردی کا نشانہ بننے والے شہیدسید اریب احمد کا جسد خاکی پیرکی صبح غیرملکی پرواز ای کے 600 سے کراچی پہنچا، اس موقع پر گورنر سندھ عمران اسماعیل،وزیربلدیات سعیدغنی،میئر کراچی وسیم اختر سمیت ایم کیوایم پاکستان کے ارکان قومی وصوبائی اسمبلی بھی جسدِ خاکی وصول کرنے کے لیے ایئرپورٹ پرموجود تھے۔

ایئرپورٹ سے سیداریب احمد کے جسد خاکی کو دستگیرکے علاقے میںگھر منتقل کیا گیا،جہاں سنگم گراونڈ میں اریب کی نماز جنازہ ادا کی گئی، نماز جنازہ میں سیاسی، سماجی شخصیات اور اہل محلہ سمیت دیگر افراد نے شرکت کی جب کہ ان کی تدفین سخی حسن قبرستان میں کی گئی۔

(جاری ہے)

اریب اپنے والدین کی اکلوتی نرینہ اولاد تھا جو چند سال قبل چارٹرڈ اکائونٹنٹ بننے کے بعد ترقی کی منازل طے کرتا ہوا نیوزی لینڈ پہنچا اورجنونی قاتل کی گولیوں کا نشانہ بن گیا۔

قبل ازیں سانحہ کرائسٹ چرچ کے شہید اریب احمد کا جسد خاکی غیرملکی پروازای کے 600سے کراچی پہنچا دیا گیا۔ اس موقع پر گورنرسندھ عمران اسماعیل،وزیربلدیات سندھ سعید غنی، میئرکراچی وسیم اختر، کمشنرکراچی افتخارشلوانی ،ایم کیوایم پاکستان کے ارکان قومی وصوبائی اسمبلی بھی موجود تھے۔میت ایئرپورٹ سے اریب کے گھرمنتقل کی گئی۔گورنرسندھ نے کہاکہ اریب کے والدین کے دکھ میں برابر کے شریک ہیں، اریب کی فیملی کیلئے جو کچھ کرنا پڑا کریں گے، وزیراعظم نیوزی لینڈ نے اپنے رویے سے عالم اسلام کا دل جیت لیاہے۔

انہوں نے کہاکہ اس واقعے کو دہشت گردی کے علاوہ کوئی نام نہیں دینا چاہیے،دنیا میں اسلام کو غلط طریقے سے پیش کیا جا رہا ہے۔گورنر سندھ نے کہا کہ اسلام ہمیں مل جل کر رہنے کی تعلیم دیتا ہے، ہمیں اس پیغام کو دنیا تک پہنچانا ہے، دہشت گردی کا کسی مذہب سے تعلق نہیں ہوتا۔اس موقع پر میڈیا سے بات چیت کرتے ہوئے وزیربلدیات سندھ سعیدغنی نے کہاکہ اریب کے والد کا حوصلہ بلندہے،سیاسی جماعتوں کے کارکن شہدا سے اظہار یکجہتی کے لیے آئے ہیں ، اس بے گناہ نے لوگوں کی جان بچانے کی کوشش کی تھی ، ہمارے بس میں جوہوگا حکومت سندھ کی جانب سے وہ سب کریں گے۔

میڈیا سے بات چیت میں میئرکراچی نے کہا کہ اریب ماں باپ کا ایک ہی بیٹا تھا، یہ افسوس ناک واقعہ ہے ،وہاں کی وزیر اعظم اور نیوزی لینڈ کے عوام نے مسلمانوں کے ساتھ جو یکجہتی کا اظہار کیا وہ متاثر کن ہے میں کراچی کے شہریوں کی جانب سے نیوزی لینڈ کی وزیر اعظم اور وہاں کی عوام کا شکریہ ادا کرتا ہوں ۔ انہوں نے کہا کہ دنیا میں اور خصوصا پاکستان میں عام شہری کے پاس اسلحہ پر پابندی ہونا چاہئے تاکہ اس طرح کے واقعات کسی بھی جگہ دوبارہ نہ ہوں اس وقت پاکستان سمیت دنیا کو اسلحہ سے پاک ماحول کی ضرورت ہے۔

اس موقع پروسیم اخترنے شہریوں کی جانب سے سید اریب کے تابوت پر پھولوں کی چادر چڑھائی۔اریب کے پڑوسی نے میڈیا سے بات چیت میں کہاکہ اریب اچھا بچہ تھا ہمارے سامنے بڑا ہوا، وہ ماں باپ کا ایک ہی سہارا تھا،ایک چھوٹی بہن ہے، اریب کی شادی کی تیاریاں چل رہی تھیں۔خیال رہے اریب نے حال ہی میں چارٹرڈ اکائونٹنٹ کے طور پر اپنی تعلیم مکمل کی تھی اور اس کے بعد بہتر مستقبل کی تلاش میں نیوزی لینڈ روانہ ہوئے تھے۔