آصف زرداری کو منی لانڈرنگ کیس منتقلی کیخلاف اپیل پر جواب الجواب جمع کرانے کی ہدایت

منی لانڈرنگ کیس سپریم کورٹ کے حکم کے مطابق راولپنڈی منتقل ہوا، آصف زرداری و دیگر کی اپیلیں ناقابل سماعت ہیں،نیب کا موقف

منگل 26 مارچ 2019 17:46

کراچی (اُردو پوائنٹ اخبارتازہ ترین - این این آئی۔ 26 مارچ2019ء) سندھ ہائی کورٹ نے آصف زرداری کو منی لانڈرنگ کیس منتقلی کیخلاف اپیل پر جواب الجواب جمع کرانے کی ہدایت کردی۔سندھ ہائی کورٹ میں سابق صدر آصف زرداری، فریال تالپور و دیگر کی منی لانڈرنگ کیس کراچی سے اسلام آباد منتقلی کے خلاف اپیلوں کی سماعت ہوئی۔

(جاری ہے)

نیب نے اپنے جواب میں کہا کہ منی لانڈرنگ کیس اور نیب ریفرنسز کا آپس میں بنیادی تعلق ہے، منی لانڈرنگ کیس سپریم کورٹ کے حکم کے مطابق راولپنڈی منتقل ہوا، آصف زرداری و دیگر کی اپیلیں ناقابل سماعت ہیں۔

عدالت نے آصف زرداری اور دیگر درخواست گزاروں کے وکلا کو جواب الجواب جمع کرانے کی ہدایت کرتے ہوئے سماعت 2 اپریل کے لیے ملتوی کردی۔منی لانڈرنگ کیس کراچی سے اسلام آباد منتقلی کے خلاف آصف زرداری، فریال تالپور، انور مجید، اے جی مجید، حسین لوائی اور طحہ رضا نے اپیلیں دائر کر رکھی ہیں۔ ملزمان کا کہنا ہے کہ نیب کے 16 ریفرنسز اور منی لانڈرنگ کیس کا آپس میں کوئی تعلق نہیں۔واضح رہے کہ کراچی کی بینکنگ کورٹ نے میگا منی لانڈرنگ کیس کراچی سے اسلام آباد منتقل کردیا ہے۔