نیب قانون کے تحت نجی کمپنی کے معاملات پر احتساب بیورو کارروائی نہیں کرسکتا،آصف زر داری نے جواب ہائیکورٹ میں جمع کرادیا

میرا اور بلاول بھٹو کا پارتھینون کمپنی سے کوئی تعلق نہیں، پارک لین کمپنی میں ایک چھوٹا شراکت دار ہوں،جواب میں موقف

ہفتہ 13 اپریل 2019 15:04

نیب قانون کے تحت نجی کمپنی کے معاملات پر احتساب بیورو کارروائی نہیں ..

اسلام آباد (اُردو پوائنٹ اخبارتازہ ترین - این این آئی۔ 13 اپریل2019ء) پاکستان پیپلز پارٹی کے شریک چیئر مین اور سابق صدر آصف علی زر داری نے جعلی بینک اکاونٹس کیس میں اسلام آباد ہائی کورٹ میں جواب جمع کرادیا ہے جس میں کہاگیاہے کہ پارک لین کمپنی کیس پر نیب کا دائرہ اختیار نہیں، نیب قانون کے تحت نجی کمپنی کے معاملات پر احتساب بیورو کارروائی نہیں کرسکتا۔

سابق صدر نے پارک لین کمپنی اور بلٹ پروف گاڑیوں کے نوٹسز کا جواب نیب ٹیم کے حوالے کر دیا۔ آصف زرداری نے 55 سوالوں کے تحریری جواب دے دیئے۔

(جاری ہے)

جواب میں کہا گیا کہ پارتھینون کمپنی کو نیشنل بینک کے ڈیڑھ ارب روپے قرض کا علم نہیں، پارک لین کمپنی 1989 میں صدرالدین ہاشوانی سے خریدی، اقبال میمن، کم عمر بلاول، رحمت اللہ، محمد یونس، الطاف حسین میرے شراکت دار تھے۔آصف زرداری نے جواب میں کہا کہ پارک لین کمپنی میں صرف 25 فیصد حصص کا مالک تھا، صدر بننے سے پہلے یکم ستمبر 2008 کو کمپنی ڈائریکٹرشپ سے مستعفی ہوا، میرا اور بلاول بھٹو کا پارتھینون کمپنی سے کوئی تعلق نہیں، پارک لین کمپنی میں ایک چھوٹا شراکت دار ہوں، نجی کمپنی سے متعلق نیب کا سوالنامہ اختیارات سے تجاوز ہے۔